PENGKHOTBAH 12 - Susula Malalaok Hehelu Palak Ma Hehelu Beuk

¹ Mafandendelek manamakadada'dik o-a, beidai o bei muli-solum-ma, nai lelek teu-teuk fo henuk no doidosok-ka beita losa fa. Nai tepo-lelek ndia, neukose o mafa'da mae, “Au so'dang-nga ua-nalen ta.”

² Metema faik ndia losa soona, o matam-ma keluha'buk, nalosa le'do, bulak nduuk keluha'buk. Ko'as masakoko'ak fo u'dan-na sanga mai-a, no nahele o, nono'kabai ana fe nasanene'da mahelek.

³ O alum-ma dele, ma ana ta fe nasulu-nahapak so'on. O ei makadelem-ma, neukose ana lali neme mamanan-na mai fa, nanahu ta nabe'i fa. O nisim-ma ta namadai soaneu aale nana'ak fa. O matam-ma keluha'buk, nalosa ana tao-na o mata memetem-ma keluha'buk.

⁴ Makalupu-makaseek manai enok lain-na, ana losa o di'idoom-ma, nono'ka bai neme dook-ka mai. Sasanu liik-ka, ma leleo a'bas-sa liin-na, hihii nae ta namanenek fa. O ta hapu sungu mamanee fa. Manupui halak-ka boe, tao-na o fo'a.

⁵ O ta mapalani nda'e leo mamana madema muu fa, de muse la'ok besa-besa. O langa doom-ma mofa, ma nai lelek o la'ok-ka, o helak o eim-ma. Boema mopo la'iesak o dale hihii-nanaum lala'en-na. Ita la'ok tasale leo ita mamana mate'en-na teu. Hataholi-la falu, ma lakaleleu ndolo-ndolo enok-ka.

⁶ Neukose ketu namosina lilofulak-ka fo ana tapasasala; tu'da heni banu lilopilas-sa de ba'en; ketu heni hai dodoluk-ka talin-na de ba'en; kete-a nakalulutuk de bibian-na tonggela.

⁷ Neukose ita aopaan-na ana fali, fo ana da'di afu nai daebafak-ka. Neukose ita ani hahaen-na, ana fali leo Manetualain neu. Ndia nde manafe-ka, fo da'di leo baba'e-babatik.

⁸ Au afa'da ae, memak basa sila-la manada'di tak, basa-basan palsuma, ma sosoa-ndandaan taa.

Dede'a keke'un-na

⁹ Manadudu'a-dodook ndia dodole maneu ma manatee-tenok. Hu ndia de, nanoli malelak lala'en-na neu Manetualain anan-nala. Nanoli dede'a nakandandaak makadotok boema ana fola ndoon-na.

¹⁰ Ana sanga enok, fo hapu dede'a kokolak kokoe-nanasik, ma ana sulak dede'a-kokolak-kala nde been-na tunga ndoon-na.

¹¹ Hataholi dodole maneu-a hala-kokolan ndia, sama leo manafoo esa aitete'e matanen-na, aitete'ek fo ana paken soaneu nasulu-nahapa bi'ilopon-nala. Dede'a makandandaak ma nanoli-nafa'dak, nanatao nakabubuak sama leo pakuk-ka ana tola de nahele. Manetualain baba'e-babatin basa sila-la boe, Ndia fo ita manafoo kisan-na.

¹² Anang-ngonei, la'eneu dede'ek esa ia soona, o muse manea besa-besa. Susulak nanasulak-ka, ta hapu mate'en-na fa, ma tanoli ba'uk-ka nanseli soona, tao nasota aopaa samanek.

¹³ Au tai-dodoo basa sila-la boema, au hapu dede'a keke'un-na nde ia. Bii-namata'u Manetualain, ma tunga la'iesak paletan lala'en-na, nana ka'da soaneu dede'ak ndia nde Manetualain nakadada'dik hataholi daebafak-ka.

¹⁴ Neukose Manetualain naketu-nala'di la'iesak ita tatao-nono'in; malole ma mangalauk, nakalenak nananafunik-kala boe.