PENGKHOTBAH 11 - Susula Malalaok Hehelu Palak Ma Hehelu Beuk

Hataholi manatee-tenok-ka ho'i nakeketuk

¹ Pe'da o doim-ma neu uma pe'da doik manai nusa dea. Tao leo bee-o, o hapu nanalak nai fai makabuin.

² Pe'da o doi pokom-ma neu manadangan mata-matak-kala, sanga-ma enok makadotok. Nana hataholi-a paluu nanea, nai lelek soe-a beita tuni la'e fan.

³ Ai ndia tu'u leo bee neu boeo, neukose ndook-ndoo nahele nai mamanak fo ana tu'u neu. Metema ko'as-sa nggeok nanseli soona, u'da matuaina boeo, ana mai leo daebafak-ka mai.

⁴ See nahani losa anin-na nakama'a ma lalai namaneu, soona neukose ana ta sele-nggali fo ana ta ketu-kolu buna-boan fa.

⁵ Manetualain tao basa-basan lala'en-na, ma hataholi daebafak-ka ta bisa nalelak nakeketun-na fa; leondiak boe ta nalelak so'da beuk-ka momoli-dada'din nai inak esa ilun dale fa.

⁶ Sele-nggali o bini-nggem nai faik fafain-na ma boso hahae nai fai le'odaen-na. Nana ita ta bubuluk sesele-nggalik bee kande moli no malole fa. Fafa'kama duas moli no malole boe.

⁷ Le'do haan-na neni ua-nalek namahokok-ka ba'un-na seli metema hapu name'da nitan.

⁸ Ela leo been-na, o moke makasi, metema teum-ma popo-tama. Tehu mafandendelek, te leomae o maso'da-mala dook-ka nai daebafak-ka boe, o le'do-faim manai daebafa mamates-sa, doon-na lena seluk bai. Da'di o nau mamahena beek bai? Basa-basan palsuma ma manada'di tak.

Nanoli-nafa'dak soaneu hataholi muli-soluk

⁹ Hai muli-soluk-kala lemin, mame'da mita o fai muli-solum-ma no malole! Mamahoko-setelee beidai o bei muli-soluk. Tao matetu o samanem-ma hihii-nanaun lala'en-na, tao matetu la'iesak o dale hihii-nanaum. Tehu mafandendelek te, Manetualain manai nusa so'dak-ka, mahani te, naketu-nala'di la'iesak o tatao-nono'im.

¹⁰ Usi heni o dale manafalahaam-ma, ma susa neme o dalem dale mai, nana o fai muli-solum-ma seli no lai-laik.