PENGKHOTBAH 1 - Susula Malalaok Hehelu Palak Ma Hehelu Beuk

¹ Dede'a-kokolan manai buku ia dalek neme Manadudu'a-dodook-ka mai, fo nde Dauk anamanen menanggati Dauk da'di manek nai Yerusalem.

² Manadudu'a-dodook-ka nafa'da nae, Basa-basan lala'en-na manada'di tak, ma sosoa-ndandaan ta. So'dak ndia palsuma, ma basa-basan sosoa-ndandaan ta.

³ Nai ita fai maso'dan-na dalek, ita taue-tale'di no puse titik. Tehu buna-boan nde bee, fo ita bisa tamatutua ita dalen-na?

⁴ Tititi-nonosik esa to'da mai, ma tititi-nonosik nggelok sapu-lalo, tehu daebafak-ka matak esa nahele.

⁵ Le'do bei tii mai, ma bei tenak neu boe. No sosota-mamanguk, ana fali ne'un leo mamana makasososan-na neu, boema ana tii seluk.

⁶ Anin-na fuu leo kona neu, boema ana fuu leo kii neu; ana puta neu mai, boema ana fali seluk.

⁷ Basa lee-la faa leo tasi leu, tehu tasi ta hapu henu fan. Oen-na fali leo lee langan-na neu, boema ana mulai faa seluk.

⁸ Basa-basan lala'en-na neni pela-maluak, ma pela-maluak ndia, ta hapu nafa'da-nala fan. Ita matan-na ta nakabete memetek fa; di'idook-ka ta pela namanenek fa.

⁹ Hata fo ana da'di nita, neukose ana da'di seluk. Hata fo nanatao-no'i nitak, neukose nanatao-no'ik seluk. Ta hapu hata esa beuk nai daebafak ia fa.

¹⁰ Hapu hataholi nafa'da nae, “Mitak, ia beuk!” Tehu beita bongi ita fa, te ndia da'di so.

¹¹ Hataholi a neukose ta nafandele manada'dik manai fai maneuk-ka fa. Leondiak boe, manada'dik besak ia ma manamai ka, neukose hataholi-a ta nafandelen nai fai manamaik-ka fa.

Hata fo Manadudu'a-dodook-ka la'oladin nai maso'dan-na dalek

¹² Au, fo Manadudu'a-dodook-ka paleta nai Yerusalem da'di leo manek neu Israel.

¹³ Au daleng-nga kisak soaneu palisak matalolole ma anoli no dudu'a-aafi manatee-tenok neu basa hata lala'en fo ana da'di nai daebafak ia. Ua-nalek fo Manetualain sadian ba'eneu ita, te'e-te'e neni dale he'dik.

¹⁴ Au ita basa hataholi manai daebafak ia lala'en-na, tatao-nono'in so. Mamahele leona, te basa sila-la manada'di taak, sama leo sanga enok fo usi anin-na.

¹⁵ Fo manapeko-pakik-ka, ta hapu tao namandoo fan, ma hata fo ta hapu fan, ta hapu leke nala fan.

¹⁶ Au dodoo ae, “Au ia da'di hataholi nanapaluuk ma manatee-tenok, de au manatee-tenok lena heni basa manapaleta manai Yerusalem te au beita. Au anuu malelak makadotok”.

¹⁷ Boema au daleng-nga kisak soaneu bubuluk malelak-ka no nggoak-ka ta matak esa fa, nai manatee tenok-ka no nggoa-panganaa-ka. Tehu se'kona, au ia ka'da sama leo hataholi manausi anin mesak-kana.

¹⁸ Nana ita manatee-tenon-na boetai namaba'uk-ka soona, ita bibii-namata'un boeo, boetai namaba'uk-ka. Ma ita malelan-na boetai namaba'uk-ka soona, ita susan-na boeo, boetai namaba'uk-ka.