OBAJA 1 - Susula Malalaok Hehelu Palak Ma Hehelu Beuk

Neukose Manetualain huku Edom

¹ Nabi Obaja nafa'da ela-ka nde ia. Nanduku-nakalolosak Manetualain Fo Mademaina hala hehelun-na la'eneu leoina Edom-ma. Manetualain haitua basa hataholi nadedenu-na neu leoina-la, de ita tamanene basa neni hala heheluk-ka nae leo ia, “Maheheleaom leona, fo matee-mata'ti! Mai fo teu sapu-ta Edom.”

² Ma neu Edom, Manetualain, nafa'da nae, “Au tao-a o ndole-ndaku, nalosa basa leoina-la lakadadaek o.

³ O dale manakoao-ndaeaom-ma ke'di-ndiu o so. O nusam-ma polon-na nde been-na lete batu matea-mahelek. O mamana leleom-ma nai lete madema-la poin-na. Hu ndia de, emi bedoo mae, see kande bisa tao nabuu au?

⁴ Leomae o taom-ma o umam-ma dema manupui kaka'ka ndunun-na, ma dema nduuk manai lalai-la boeo, tao leo bee-o, neukose Au tao atu'da henin.

⁵ Nakodaa do manabonga uma, ala mai nai fai le'odaen-na, ala ho'i ka'da hata fo lahiik-kana. Hataholi manaseu angol nai osi dale, ana bei seu ela boak de'ubee. Tehu neukose o musum-mala, ala sapu balisi o.

⁶ Hei Esau tititi-nonosin-nala lemin, ala kae o umam-ma, fo o ala ho'i leni o mafuni hata-heto-la boe.

⁷ O nonoom manalook o-a, ala ke'di-ndiu o, de ala usi heni o neme o nusam-ma mai. O tia-laim-mala sengi o, ma hataholi manala'a lakabubua loo o-a, lakahihi'ik-la o. Ala beetane la'eneu o lae, ‘Besak ia, malelan lala'en-na nai bee?’

⁸ Nai faik fo Au huku Edom soona, Au tao amopo-amate hataholi manatee-tenon-nala. Ma neukose, mopo basa sila malelan lala'en-na, fo ta hapu sesee bobolon nai bee fa.

⁹ Basa palani ta'ti batu maneme Téman mai, neukose ala bii lanseli, ma neukose mate basa solda'du Edom-mala.”

Hu beek de, Edom nanahukuk

¹⁰ “O tao balakaik neu o tolanoom-mala, fo Yakob tititi-nonosin-nala so. Hu ndia de neukose mopo-mate o, ma hataholi nakamu-nakadau o losa dodoon-na.

¹¹ O mapadeik nai dook-ka, nai faik fo musu tao nakalulutuk Yerusalem lelesun-na, de ana sengi kota ndia. Nai lelek ala ho'i leni la'iesak Yerusalem su'i-beten, de ala baba'en, tehu o ta mahala mae le'e esa boen. O mangalaum-ma sama no musu sila-la.

¹² Ta nandaa, o mamahoko nai hataholi Yehuda-la susa-soen-nala dalek, ma mamahoko nai faik fo o tolanoom ndia mopo-mate. Ta nandaa, o tui dede'a sosoa-ndandaa tak nai lelek ana susa.

¹³ Ta nandaa, o masok leo Au anang-ngala kotan dale, fo eki matadale hataholi manadoi-dosok-ka, lena-lenak o mamanako meni hata-heton nai fai to'a-tan-na!

¹⁴ Ta nandaa, o mapadeik muu eno kaba'ek-kala, fo mapadedeik-ma, hataholi fo nalai neme musu dale mai, do nai faik ala hapu toto'a-tataak-ka, o fes leo musun-nala neu.”

Neukose Manetualain naketu-nala'di leoina-la

¹⁵ “Tete'ek-ka fain-na deka soaneu Au, Manetualain, aketu-ala'di leoina-la. Hata fo Edom tao-no'in, neukose ana hapu babalan-na. Boeo neukose, neme'da hata fo ana tao-no'in.

¹⁶ Au anang-ngala linu nininuk fo nalupa sila huhukun-na so, nai Au lete malalao-malalafung lain. Tehu nininnuk ba'eneu leoina manai daebafak ia, makahe'duk lena seluk bai. Ala ta hapu latapo'i leme huhukuk ndia mai fa. Sila muse linun losa basan, fo basa soona, neukose mopok-kasa fo ta hapu sesee-bobolon lai bee fa.”

Israel sengi

¹⁷ “Tehu neukose, hapu nggelok laso'da nai lete Sion-na, fo letek ndia ana da'di mamana hehelik soaneu Au. Soona neukose, Yakob tititi-nonosin hapu falik sila dae pusakan-na.

¹⁸ Neukose Au anang Israel sama leo ha'i, fo na'a heni basa Esau tititi-nonosin, sama leo ha'i na'a heni ha'deaik-ka nai tina. Ta hapu hataholi esa boen neme Esau tititi-nonosin mai, neukose naso'da. Au, Manetualain nde manakokolak-ka!

¹⁹ Hataholi Yehuda Kona-la, neukose langatuu-la Edom. Hataholi maneme letelepak muli-la, neukose latona-la nusa Filistin-na. Leo Benyamin-na, neukose nagatuu-na Gilead, ma Au anang Israel, neukose koasa-na Efraim no Samaria lala'en-na.

²⁰ Hataholi Israel Kii-la, neukose fali ma'is leme mamana tu'u-tapak mai, fo langatuu-la Fenisia losa Sarfat. Hataholi Yerusalem nanafook manai Sardis-sala, neukose ala fali ma'is, fo lanuu kota-kota manai Yehuda boboan kona.

²¹ Yerusalem laun manasengin-nala, neukose leu sapu-la Edom, fo ala sengin. Soona Au, Manetualain neukose paleta da'dileo manek.”