NEHEMIA 8 - Susula Malalaok Hehelu Palak Ma Hehelu Beuk

Ezra lees Hoholo-lalanek fe laun-na

¹ Nai hataholi Yahudi-la bula ka hitun-na, hataholi Israel-la esa-esak leo nahele nai kotan-na so. Nai bulak ndia fain esa boema, basa-basas lakabubua nai Yerusalem, fo nai Lelesuina Oe-a matan-na. Ala loke Imam Ezra fo malelaina nai Hoholo-lalanek ndia fo ela ana ho'i neni Susula Hoholo-lalanek fo nde Susula Hoholo-lalanek fo Manetualain fen neu Israel tunga Musa.

² Boema Ezra neni susulak ndia leo nakabuak dale neu, fo nai ndia hapu touk, inak ma ni'iana fo lalelak so.

³ Basa boema Ezra lees fe laun-na Hoholo-lalanek ndia mulai neme fafaik losa le'dohana. Basa-basas lamanene ma ala taoafik besa-besa lon.

⁴ Ezra napadeik neu mimbar ai fo ala sadian soaneu natotongok ndia lain. Hataholi mapadeik manai boboa konan-na nde ia: Matica, Sema, Anaya, Uria, Hilkia, ma Maaseya; ma manamapadeik manai boboa kiin-na: Pedaya, Misael, Malkia, Hasum, Hasbadana, Zakharia ma Mesulam.

⁵ Loanak fo Ezra napadeik nai lain ndia, dema lena hataholi sila-la, nalosa basa-basas hapu litan. No lai-laik ana buka susulak ndia boema, basa-basas fo'a lapadeik.

⁶ Boema Ezra nae, “Koa-kio Manetualain, Manetualain fo matuaina!” Laun-na lala'en-na so'uk liman-nala leo lain neu ma lataa lae, “Amin, amin!” Boema ala sene-do'ok neu Manetualain.

⁷ Basa ndia boema, ala fo'a lapadeik de esa-esak neu mamanan-na, lelek hataholi Lewi de'ubee lafa'da mangalele'do fes, hoholo-lalanek ndia. Hataholi Lewi sila-la nde: Yesua, Bani, Serebya, Yamin, Akub, Sabetai, Hodia, Maaseya, Kelita, Azarya, Yozabad, Hanan ma Pelaya.

⁸ Ala salin Manetualain Hoholo-lalanen ndia neme baba'ek leo baba'ek neu, boema lafa'da mangalele'don, nalosa laun-na lalelak lelees ndia sosoa-ndandaan.

⁹ Lamanene Hoholo-lalanek ndia nanalees boema, laun-na dalen-nala he'dis nanseli, boema ala kii. Boema gobelnol Nehemia ma Imam Ezra fo malelaina nai Hoholo-lalanek ndia, boema hataholi Lewi manamafa'da mangalele'do Hoholo-lalanek ndia, lafa'da laun-na lala'en-na lae leo ia, “Faik ia, fai hehelik ba'eneu Manetualain fo emi Manetualaim-ma, da'di dalem-mala boso he'dis-sa, do kii.

¹⁰ Besak ia, fali me'um-ma leona; mi'a-minu no namahokok. Fe emi nana'a-nininum ma emi angol-la seli leo hataholi manato'a-taak-ka. Faik ia, fai hehelik ba'eneu ita Manetualain-na, da'di boso dale he'di. Namahokok fo Manetualain fen neu emi-a, neukose natetea-nahehele emi.”

¹¹ Hataholi Lewi-la boeo, lakatetesa-lakatatamak laun-na dalen-nala, ma lafa'da do'e-do'e lae, “Dalem-mala boso he'dis nai faik fo hehelik ia.”

¹² Boema laun-na lala'en-na fali le'us, fo la'a-linu, boema ala baba'e fe hataholi fe'ek-kala nana'a-nininuk. Lamahoko nanahu lamanene lelees ndia, boema lalelak sosoa-ndandaan.

Feta Lalaa Akidook

¹³ Balahaa boema basa mane leo-la, basa imam-mala ma hataholi Lewi-la lakabubua, boema leu leo Ezra leu, fo lanoli Manetualain Hoholo-lalanen nanolin-nala.

¹⁴ Ala hapun nai ndia, nae nai Hoholo-lalanek fo Manetualain fen tunga Musa dalek, Manetualain nadenu hataholi Israel-la leo lai lalaak-kala dalek, nai lelek Feta Akidook-ka.

¹⁵ Hu ndia de, nai Yerusalem lala'en-na, nai kota-kota ma nai nggolo-nggolok-kala, ala po'a-benga paleta nde ia, “Meu leo letelepak-kala meu, fo ho'i kaiou ndanak, setun, ai mina, palma ma ai fe'e-fe'ek-kala, fo tao lalaak nandaa no nakanenetek manai Susula Hoholo-lalanek dale.”

¹⁶ Boema laun-nala leu ho'i ai ndanak sila-la. Sila basa-basas tao lalaak nai uman-nala kala matetun lain, nai uman-nala so'dan-na, nai Manetualain Uman-na so'dan manai uluk-ka, nai mook fo manadeka no Lelesuina Oe-a ma nai mook manadeka no Lelesuina Efraim-ma.

¹⁷ Basa laun fo manafali ma'is leme mamana tu'u-tapak mai, ala tao lalaak sila-la, boema ala leo lema ndia. Ia nde soaneu ka la'i esan-na, ala tao dede'ak ndia, mula neme Yosua fo Nun anan-na tepo-lelen-na, boema basa-basas lamahoko ma laua-lanale.

¹⁸ Ala tao feta faik hitu dalen-na. Tunga faik, Ezra lees Manetualain susula Hoholo-lalanen neme baba'ek leo baba'ek neu. Neu fai ka falun-na boema, feta nate'e, nandaa no Hoholo-lalanek nakaneneten-na.