NEHEMIA 3 - Susula Malalaok Hehelu Palak Ma Hehelu Beuk

Yerusalem papala nanadaman-na nanatao nahiik

¹ Ia nde been-na hala nafafa'dak la'eneu tao leo bek de Yerusalem papala nanadaman-na nanatao nahiik. Imam Matua Elyasib-pa no nonoon-nala lafofo'a falik Lelesuina Bi'ilopo-a ma ala pasak lelesu-la doon-na, de ala fe hehelin ba'eneu Manetualain. Ala tao lahiin de ala fe hehelik papala nanadamak-ka losa Uma Puni Madema Natun Esa ma losa leo Uma Puni Madema Hananeel-la neu.

^2-16 Fe'ek neme imam sila-la mai, hataholi fo na'den-nala nanasulak nai nisi daen ia, ala tao lahii kota papala nanadaman-na, boema lelesuina-la, ma uma puni mademan-nala. Hataholi sila-la na'den-nala nde ia: Hataholi Yerikho la, Zakur fo Imri anan-na. Leo-ingu Senaa: Leleina I'ak-ka no lolon-nala, lelesu dook-kala, pakuk-kala lo ai betubalan-nala Meremot fo Uria anan-na fo Hakos upun-na. Mesulam fo Berekhya anan-na fo Mesezabeel upun-na. Zadok fo Baana anan-na Kota Tekoa laun-nala (basa kota ndia hataholi nananita-nalelan-nala ta nau tao bela-ba'uk mabela fa). Yoyada fo Paseah anan-na ma Mesulam fo Besoja anan-na: Lelesuina Yesyana no lolon-nala, lelesu dook-kala, pakuk-kala lo ai betubalan-nala Melaca neme Gibeon ma Yadon neme Meronot mai. Hataholi Gibeon-nala ma hataholi Mizpa-la: papala nanadamak-ka losa leo gobelnol Efrat Muli uma manen-na neu. Uziel, tuka lilopilas, fo Harhaya anan-na. Hananya, hataholi manatao mina kaboomenik; losa Papala nanadamak Maloa. Refaya fo Hur anan-na, ana koasa kota Yerusalem-ma seli. Yedaya fo Harumaf anan-na: papala anadamak manadeka no uman-na. Hatus fo Hasabneya anan-na. Malkia fo Harim anan-na ma Hasub fo Pahat-Moab anan-na: papala nanadamak manatuti nana ma Uma Puni Madema fo Mamana tutunu loti. Salum fo Halohes anan-na, ana koasa kota Yerusalem-ma seli, ana inaanan-nala falin. Hanun ma Zanoah laun-nala: Lelesuina Bafak-ka no lelesu dook-kala, pakuk-kala, lo ai betubalan-nala. Boeo ala hapu papala nanadamak ka nalun-na metel natun haa haahulu losa Lelesuina Kadafuk-ka. Malkia fo Rekhab anan-na, ana koasa kota Bet-Kerem ma: Lelesuina Kadafuk-ka no lelesu dook-kala, pakuk-kala lo ai betubalan-nala. Salum fo Kolhoze anan-na, ana koasa kota Mizpa: Lelesuina Oe Mata no sisinin-na lelesu dook-kala, pakuk-kala lo ai betubalan-nala. Boeo ala hapu Lifu Selah papala nanadaman-na deka no uma manek-ka osin-na losa eda-edak manakona neme Dauk kotan-na mai. Nehemia fo Azbuk anan-na, ana koasa kota Bet-Zur-ra seli: papala nanadamak-ka losa Dauk teidalen-nala laten-nala, ala tao lifu ma uma solda'du-la.

Hataholi Lewi fo manatunga tao lahii papala nanadamak-ka

^17-21 Hataholi Lewi fo lafofo'a papala nanadamak-ka tututin de'ubee, na'den-nala nde ia: Rehum fo Bani anan-na Hasabya, ana koasa kota Kehila seli. Papala nanadamak fo soaneu ndia kotan-na. Binui fo Henadad anan-na, ana koasa kota Kehila seli. Ezer fo Yesua anan-na, ana koasa Mizpa: papala nanadamak manai enok-ka su'un na, nai Uma pepe'da tafa-sisilo matan-na. Barukh, fo Zabai anan-na: papala nanadamak maneme enok-ka su'un-na losa Imam Matua Elyasib uman-na lelesun-na. Meremot fo Uria anan-na fo Hakos upun-na: papala nanadamak maneme Elyasib uman-na lelesun-na mai, losa uma ndia pe'dan-na.

Basa imam fo manatunga tao lahii papala nanadamak-ka

^22-26 Basa imam fo manatao matalolole papala nanadamak ka tututin de'ubee, na'den-nala nde ia: Imam-imam fo manaleo deka loo Yerusalem-ma. Benyamin ma Hasub: papala nanadamak manai sila uman-na matan-na. Azarya fo Maaseya anan-na, fo Ananya anan-na: papala nanadamak manadeka no uman-na. Binui fo Henadad anan-na, papala nanadamak maneme Azariah uman-na mai, losa papala nanadamak-ka bu'un-na. Palal fo Uzai anan-na: papala nanadamak maneme papala nanadamak-ka bu'un-na mai, ma uma manek-ka uma puni mademan manai lain-na, deka no uma naneak-ka so'dan-na. Pedaya fo Paros anan-na: papala nanadamak-ka losa Lelesuina Oe matan-na, fo nai boboan dulu ma uma puni madema fo mamana naneak Manetualain Uman-na. (Ta dook-ka neme mamanak ndia, hapu nggolok mana'de Ofel, fo hataholi manatao Manetualain Uman-na, mamana leleon-na.)

Manatao bela ba'uk fe'ek-kala

^27-32 Hataholi fo na'den-nala nde nisi daen ia, nde tao lahii papala nanadamak-ka tututin de'ubee, nde ia: Kota Tekoa laun-nala: papala nanadamak maneme Manetualain Uman-na uma nanea puni maeman-na, losa papala nanadamak manai nggolo Ofel-la. Imam-imam fo manaleo deka loo Lelesuina Ndala: papala nanadamak fo nasasale matak no sila esa-esak uman-na, neme lelesuina ndia mai fo nakandoo leo boboan kii neu. Zadok fo Imer anan-na: papala nanadamak fo nasasale matak no uman-na. Semaya fo Sekhanya anan-na, fo manamanea Lelesuina Dulu: papala nanadamak fo nasasale matak no uman-na. Hananya fo Selemya anan-na ma Hanum fo Zalaf ana ka 6-a. Mesulam fo Berekhya anan-na: papala nanadamak fo nasasale matak no uman-na. Malkia, tuka lilopilas esa: papala nanadamak-ka losa hataholi manatao Manetualain Uman-na mamana leleon-na ma manadangan-nala uman-nala nai Lelesuina Mifkad ma hihinae losa kama manai lain-na, nai papala nanadamak-ka boboan dulu tasi bu'un-na. Basa tuka lilopilas-sala ma manadangan-nala: papala nanadamak-ka pe'da mate'en-na mulai neme kama manai lain-na nai papala nanadamak-ka bu'un-na, losa leo Lelesuina Bi'ilopo-a.