MIKHA 7 - Susula Malalaok Hehelu Palak Ma Hehelu Beuk

Israel ha'da-paliin ta neulauk so'on

¹ Au soe! Au sama leo hataholi kamala'ak fo neu sanga ai boak nai ai fo fai naboan-na seli so. Ta hapu ai boak nai ai-la so'on. Ala seu basa angol boak ma kaa boa malole-la so.

² Hataholi manatao tunga ndoon-na, mopok-kasa leme nusak-ka mai so, hataholi manalilinekak neu Manetualain-na, ta hapus so'on. Hataholi-la esa-esak nahani fai loak soaneu nanisa, esa-esak lona hihi'ik soane nonoo hataholin-na.

³ Basa-basas lalelak lanseli nai tatao-nono'i mangalauk-ka dalek. Manapaleta ma manakee-manafula loke doi sosolok, ma lasi nggolok-kala lakaseti laun-na tunga hihii-nanaun-nala, lalahalak sama-sama leondiak.

⁴ Hata fo malole nanseli, ma manatao tunga ndoon-na nanseli boeo, sama leo dila-nggauk, fo sosoa-ndandaan ta. Fain-na losa so, fo Manetualain huku anan-nala, sama leo hata fo Ana paleta basan soaneus, tunga nabin-nala. Besak ia, tasibu-a da'di nai sila tala'da so

⁵ Boso mamahele neu emi uma titia-tataim, boso masalai deam-ma neu tia-laim. Besa-besa moo hala-kokolam, leomae hataholi mananamanenek-ka nde been-na, o saoinam-ma mesak-kana.

⁶ Nana, nai tepo-lelek leo iak-ka nde uma isi-la, esa musu no esa; ana touk-ka nakadadaek aman, ana inak-ka la'ban inan, ma manafeu inak-ka nale'a-napilik no alinan-na.

⁷ Tehu ita tamahena neu Manetualain; ita tahani ita Manetualain, no namahehele henuk. Neukose namanene ita huhule-haladoin fo Ana soi-tefa-na ita.

Manetualain soi-tefa

⁸ Ta hapu ne'ek ba'eneu ita musun-nala, soaneu lamahoko neu ita nakalulutun-na fa. Nana leomae ita tu'da boe, tehu neukose ita fo'a seluk. Besak ia, ita nai makahatuk dale, tehu neukose Manetualain nangale'do-na ita.

⁹ Ita tasala-tasingo basa neu Manetualain so, hu ndia de besak ia, ita muse tame'da tita nasa-melun. Tehu ta dook-ka so'on, te neukose nasala'e ita, ma Ana fe ndoos ma matetuk-ka neu ita. Neukose no ita kalua leo mangale'dok-ka teu; neukose ita tame'dan tae, Ana soi-tefa-na ita.

¹⁰ Makahulun-na musu-a nakadadaek ita nenik nafa'da nae, “Manetualain, fo emi Manetualaim ndia nai bee?” Tehu besak ia, neukose lita hata fo Manetualain taon ba'eneu ita, fo neukose ala mae. Neukose ita tita matan, ita musun sila-la kala, ma nanaheheta-aa'ik sama leo tane nai enok lain.

¹¹ Hai Yerusalem! Fain-na losa so, soaneu emi mafofo'a falik emi kotam-ma papala nanadaman-nala. Nai faik ndia, neukose emi nusam-ma nanatao namaloak.

¹² Emi hataholim-mala, neukose ala fali ma'is leme su'di bee-bee mai emi – leme Asyur fo nai boboak dulu, leme Masir fo nai boboak kona, leme nusak manai Lee Efrat-ta, leme tasi maloaina selik mai, ma leme lete-letek manai dae dook-kala mai.

¹³ Tehu neukose daebafak-ka da'di dae tokotiik, nanahu laun-na tatao-nono'i mangalaun-na.

Hule-haladoi fo dokodoe Manetualain susue-lalain ba'eneu Israel

¹⁴ Ou Manetualain, foo-lolo O anam, fo O hataholi hehelem-mala. Ala leo pasi fe'e lai lasi manggiok dale, nai dae maoe-maisik tala'da. Nemen-na fo ala hapu nana'a-nininuk nai mook Basan ma Gilead, sama leo nai tepo-lelek makahulun-na.

¹⁵ Tao manada'di beuk soaneu ami leon, ou Manetualain, sama leo makahulun-na O taon, nai lelek O moo falik ami neme Masir mai.

¹⁶ Neukose leoina-la lita dede'ak ndia, fo ala mae, nanahu lame'da lae sila be'i-balakain lala'en-na, ta soa-ndaa hata esa boen. Neukose mopo dudu'a-aafin-nala, nalosa ala ta hapu kokolak do lamanene fa.

¹⁷ Neukose ala laek nai dae lain, sama leo menge-a. No bibii-namatauk ma dedelek, neukose ala kalua leme sila mamana nakatatakan-na mai, fo ala mai leo O mai, ou Manetualain, fo ami Manetualaim-ma.

¹⁸ Ta hapu Manetualain sama leo O fa, ou Manetualain, fo manafe do'o do ampon neu bei ela O hataholim nanahelek-kala, sala-singon. O ta mamanasas losa dodoon-na fa; nasafalin-na, O mamahoko matu'du O susue-lalaim fo too-lanen ta ndia.

¹⁹ Neukose O sue-lai seluk ami, ma fe do'o do ampon neu ami. Neukose O lulumu-eese ami sala-singom-mala, fo O tapas leo tasi buin-na neu!

²⁰ Soaneu O anam-mala, fo Abraham ma Yakob tititi-nonosin, neukose O matu'du O lilinekam ma O susue-lalaim fo ta nanuu too-lane ndia, sama leo hata fo makahulun eli O helu basan neu ami bei-ba'i kaim-mala so.