MIKHA 6 - Susula Malalaok Hehelu Palak Ma Hehelu Beuk

Manetualain kalaan-na neu Israel

¹ Mamanene hata fo Manetualain kalaak-kana neu Israel. Fo'a leona, ou Manetualain, fo meni O kalaam-ma mai! Nemen-na, fo letek ma pupukuk-kala lamanene hata fo O sanga mafa'dan.

² Hai letek-kala, hai daebafak-ka buin-nala lemin, mamanene Manetualain kalaan-na. Nanuu dede'ak no Anan Israel, de neukose Ana kalaak-kasa.

³ Manetualain nafa'da nae, “Hai Au anang-ngala lemin, Au tao basa beek la'eneu emi so? Nai dede'a beek-ka dalek nde Au tao susa emi? Mataa Au leona!

⁴ Au o emi kalua meme Masir mai so, ma Au soi heni emi neme ata dalek mai; Au adenu basa Musa, Harun, ma Miryam soaneu hela-nole emi so.

⁵ Au anang-ngala lemin, mafandele hata fo Balak mane Moab-pa tutu'un la'eneu emi, ma hata fo Beor anan Bileam nataa neun. Mafandele hata fo ana da'di nai emi leleo-lala'om dalek, nai emi mamana leleom nai Sitim nai Gilgal tala'da. Metema emi mafandele basa sila-la soona, neukose emi mame'da mita hata fo Au tao basan soaneu soi-tefa emi.”

Tunu-hotuk fo Manetualain nahiik-kana

⁶ Ade, hata fo ita muse tunu-hotu fen neu Manetualain, fo Manetualain manai nusa so'dak-ka, metema ita mai sene-do'ok neun? Ade, ita muse teni sapiana malole soaneu nanatunu-hotuk da'dileo tutunu-hohotu nanatunuk soaneun do?

⁷ Ade, neukose Manetualain namahoko, metema ita teni fen bi'ilopo lifu-lifun, do mina setun makadotok do? Ade, ita muse fen, ita ana ulun-na da'dileo manasoi-manatefa neu ita sala-singon-nala do?

⁸ Ta! Manetualain nafa'da basa ita, hata malole so. Fo noken neme ita mai-a nde, fo ela ita tao tunga ndoos ma matetuk, tao-no'i susue-lalaik tataas esa, ma no dale taidaek, taso'da da'di esa to ita Manetualain.

⁹ Manatee-tenok-ka nde been-na soaneu bii neu Manetualain. Naloo bou-bou neu laun manai kota nae, “Mamanene leon, hai emi fo manamakabubua manai kota lemin!

¹⁰ Nai hataholi mangalauk-kala uman, hapu hata-heto fo ala hapun neme tipu-daik-ka mai. Ala pake tatais ta matetuk, fo tatao-nono'ik esa, Au ta ahiik-kana fa. Neukose Au huku hataholi manatao tatao-nono'ik leondiak-ka.

¹¹ Masa bole, Au fe do'o do ampon neu hataholi manapake tatais ta matetuk-ka fa do?

¹² Hataholi kamasu'ik manai emi kotam-ma, ala tuni-ndeni hataholi nuu-taa hata-taak-ka, ma emi basa-basam-mala masapepeko-masandandalik.

¹³ Besak ia, Au mulai fepa ma tao akalulutuk emi, nanahu emi sala-singom-mala.

¹⁴ Neukose emi mi'a-minu, tehu emi ta makabete fa, te emi boetai mamala'a mahele. Neukose emi so'u bua-lo'as, tehu emi ta hapu manea mala fas. Emi manea mala su'di beek-ka boeo, neukose Au tao akalulutuk-kasa nai natee-natatik dale.

¹⁵ Emi sele-nggali gandum, tehu neukose emi ta ketu-kolu buna-boan fa. Neukose emi tao mina neme ai setun-na boan-na mai, tehu emi ta hapu pake minan-na fa. Neukose emi he'e angol-la oen-na, tehu neukose emi ta minu fan.

¹⁶ Basa sila-la ala da'di, nanahu emi tunga Mane Omri no anan, fo nde mane Ahab-pa tatao-nono'i mangalaun-nala. Emi tunga sila eno-dalan. Hu ndia de, neukose Au tao akalulutuk emi, ma neukose ala kuku'e-koko'dok emi, ma basa leoina lala'en-na, lakamumulu-lakamamaek emi.”