MIKHA 4 - Susula Malalaok Hehelu Palak Ma Hehelu Beuk

Manetualain daebafak-ka no mole-dame

¹ Nai fai-fai manamaik-kala, pupukuk, fo Manetualain Uma mamanan-na, neukose napadeik natetu ma boetai namadema lena heni letek-kala ma pupukuk-kala. Leoina lala'en-na, faa beosu leo naa leu.

² Neukose basa-basas lafa'da lae, “Mai fo ata kae leo Manetualain pupukun lain teu leo Israel Manetualain Uman-na teu! Neukose nanoli ita hata fo ita muse taon. Neukose ita tunga eno-dalan nana Manetualain nanolin-na neme Yerusalem mai; ana kokolak no anan-nala neme Sion mai.”

³ Neukose Manetualain naketu leoina no leoina dede'an-na, nusaina mabe'i-balakaik no nusaina mabe'i-balakaik, nau manai dook-ka do manadekak-ka boe. Neukose ala tutu sila tafainan-nala da'di tata'tis ma sila teen-nala da'di dope nggenggeuk. Leoina-la, esa ta sapun-na esa so'on, boeo ta laheheleaon fo sanga latee-lata'ti so'on.

⁴ Neukose hataholi-a esa-esak naso'da nee-nee lino-lino, ma so'da-molek nai osi angol ma osi ai kaan-na tala'da; neukose ta hapu hata nakatata'u fan, Manetualain Fo Manakoasa, hehelu-balataan nde ndia.

⁵ Basa leoina manai daebafak-ka sene-do'ok ma tunga sila lamatua daebafan-na. Tehu neukose ita tunga Manetualain, fo ita Manetualain-na, fo sene-do'ok-kana losa dodoon-na neu.

Neukose Israel fali ma'in neme mamana tu'u-tapak mai

⁶ Manetualain nafa'da nae, “Neukose fain-na losa, Au tao akabubua Au huku hataholi-la, fo nde sila manadoi-dosok nai mamana tu'u-tapak.

⁷ Ala tao lalas da'di lu'uk so, ma dook-ka leme nggolo-ta'dun mai. Tehu, neme bei ela hataholi sila-la mai, de neukose Au mulai tititi-nonosi beuk esa. Neukose ala da'di leoina matua ma mabe'i-balakaik. Neukose Au paletas nai Pupuku Sion-na losa dodoon-na.”

⁸ Ma o Yerusalem, mamanak fo Manetualain nanea anan-nala, sama leo manafoo nanea bi'ilopon-nala, neukose o da'di falik o nusam-ma polon-na, sama leo makasososan-na.

⁹ Tao le'e de, o kii mapane'e? Tao le'e de, o doi-doso sama leo inak fo ana sanga bongi? Ade, hu kande o ta manuu manek fa, do mate o manoli-mafa'dam-mala do?

¹⁰ Hai laun Yerusalem-mala lemin, maule-mapo'de ma makadii-makadau sama leo ina manabongik-ka! Nana besak ia, emi muse la'oela kota, fo meu leo nai mook-ka. Emi muse meu leo Babel meu, tehu nai naa, neukose Manetualain po'i emi neme emi musum-mala mai.

¹¹ Leoina makadotok lakabubua basa fo sapu-la o, hai Yerusalem! Lafa'da lae, “Muse tao nakalulutuk Yerusalem! Neukose ami mete kota ndia da'di ai-batu madodouk!”

¹² Tehu leoina sila ta bubuluk hata fo Manetualain tutu'uk-ka fa. Ala ta lame'da lae sila nanatao nakabubuak basak soaneu nanahukuk, sama-na leo tao nakabubua gandum-ma fo aa'in.

¹³ Manetualain nafa'da nae, “Hai laun Yerusalem-mala lemin, meu leona fo heheta-aa'i emi musum-mala! Neukose Au tao a emi da'di balakaik, sama leo sapi fo susulan-na besi ma eifangan-na liti. Neukose emi tao makalulutuk leoina makadotok, ma ala loso-la su'i-betes-sala, neukose emi tunu-hotu fen leo Au, Manetualain, fo manamakadada'dik lalai ma daebafak-ka.”

¹⁴ Hai laun Yerusalem ma lemin, moke mangalalau leona, fo ela Manetualain tulu-fali emi! Lakahapi la ita so! Musu sapun-na mauli-malanga Israel la!