MAZMUR 92 - Susula Malalaok Hehelu Palak Ma Hehelu Beuk

Nakamee kokoa-kikiok

¹ Nakameek soaneu fai Sabat-ta.

² Malolen-na seli, noke makasi neu O, ou Manetualain, ma koa-kio O, Manetualain Fo Mademaina;

³ tui-benga O susue-lalaim, nai fai fafain-na, ma O lilinekam, nai fai le'odaen-na,

⁴ boema nakaminak gitar tali ka sanahuluk-ka, sama-sama no gambus ma kecapi-a.

⁵ Nana O tatao-nono'im tao namahoko au daleng-nga, au akamee no namahokok, nanahu O tatao-nono'im.

⁶ Ou Manetualain, O tatao-nono'im matuaina nanseli, O dudu'a-aafim deman-na seli!

⁷ Hataholi nggoak-ka, ta bubuluk fa, hataholi nggoak-panganaa, ta nalelak dede'ak ndia fa.

⁸ Bole da'di, hataholi malelesik-ka moli fo nalole sama leo na'u-a, ma hataholi manatao mangalauk-ka, boetai namasu'ik-ka ma tetu-temak; tehu neukose, sila nanatao namopo-namatek losa dodoon-na,

⁹ nana O, Manetualain, koasa losa dodoon-na.

¹⁰ Ou Manetualain, ami bubuluk O musum-ma, neukose nanatao namopo-namatek basa hataholi mangalauk-kala, neukose nanatao tapasasalak.

¹¹ O tao-ma au balakaing-nga, sama leo banteng fuik-ka balakain-na, ma O ba'e-pala au, nenik ua-nale malole.

¹² Au ita au musung-ngala kakalan-na, hataholi manala'ban basa au-a, ma tutu'u eno mangalaun-nala, au amanene basan so.

¹³ Hataholi manatao tunga ndoon-na, nape'du beu, sama leo ai korma, ma ana moli de nalole sama leo ai kaiou Libanon-na.

¹⁴ Sila sama leo ai fo, nanaselek nai Manetualain Uman, de nakapela nai ita Manetualain Uman,

¹⁵ ai fo bei naboa nai tepo lelek namalasi, doon-na momo'dok nahele.

¹⁶ Ndia da'di buti, nae Manetualain ndoos ma matetuk; Ndia nde, au manamasala'eng-nga, ta hapu po'de-paik nai Ndia dalek fa.