MAZMUR 91 - Susula Malalaok Hehelu Palak Ma Hehelu Beuk

Nai Manetualain nasulu-nahapan dale

¹ Hataholi fo, nasulu-nahapa neu Manetualain Fo Mademaina, ma ana leo nai Manakoasa li'da susuen-na dalek soona,

² bole nafa'da neu Manetualain nae, “O nde au manamasala'eng, ma manamasulu-mahapang-nga, au Manetualaing, fo au amahele neu ka'da O.”

³ Neukose Ana natapo'i o neme susa-soe nananafunik-ka, ma neme he'di laus fo neni mamates.

⁴ Neukose Ana nalu'e-na o nenik li'dan-na, nalosa o nee-nee lino-lino nai nasulu-nahapan dale; lilinekan sama leo babaa fanak, fo nasulu-nahapa o.

⁵ O ta bole bii-mamata'u neu soe manai fai le'odaen-na, do manasapu no kaiboik-ka, nai fai lele'don-na;

⁶ neukose soe fo, ana mai nai fai makahatuk-ka, do nakalulutuk fo manatuni-ndenik-ka, nai fai le'dohanan-na.

⁷ Nemen-na fo, hataholi lifun esa, mate nai o boboam-ma, ma lifun sanahulu nai o boboa konam-ma, tehu, neukose o ta makahina fa.

⁸ Metema, o mete leo o boboa-kaisum muu soona, neukose o mita hataholi mangalauk-ka, sipo babalan-na.

⁹ Nana, o tao Manetualain da'di o manamasala'em-ma. Fo Mademaina o taon da'di nasulu-nahapak.

¹⁰ De neukose soe ta la'e o fa ma neukose soe ta tuni la'e o umam-ma fa.

¹¹ Manetualain nadenu ata nusa so'dan-nala lanea o, nai su'di o muu leo bee muu-a.

¹² Neukose ala so'u-la o, nai lima dalen-nala dalek, fo ela o eim-ma boso nakatunu la'e batu.

¹³ Neukose o lena seli menge ma singa, heheta-aa'i singa muli-soluk-ka ma menge malasok-ka.

¹⁴ Manetualain nafa'da nae, “Hataholi manasue-lai Au-a, neukose Au soi-tefan, ma manamanaku Au-a, neukose Au asulu-ahapan.

¹⁵ Metema, ana naloo bou-bou neu Au soona, neukose Au ataan. Neukose Au tulu-falin, nai fai toto'a-tatan-na; ma neukose, Au atapo'in, ma Au fen ha'da-holomata.

¹⁶ Neukose Au fen namahokok nenik teu manalu, ma Au soi-tefa-alan.”