MAZMUR 90 - Susula Malalaok Hehelu Palak Ma Hehelu Beuk

SUSULAK KA HAA: MAZMUR 90–106 Manetualain nde bee-na, hataholi daebafak-ka, mamana nasulu-nahapan

¹ Musa, fo Manetualain atan-na, huhule-haladoin. Ou Manetualain, O nde ami mamana nasulu-nahapan, neme bobongik leo bobongik neu.

² Lete-letek-kala beita nananakadada'dik, ma daebafak-ka beita nalupa daebafak fa, O nde Manetualain fo, manaketu basa tak, makasososan ta, ma mate'en ta.

³ O madenu hataholi daebafak-ka fali ne'un leo mamana dada'di-momolin neu, fo da'di dae sama leo makasososan-na.

⁴ Ba'eneu O, teuk lifun esa, sama leo faik esa, huas-sa fain-na seli so; fai le'odaen-na, leondiak boe.

⁵ O tao-ma ami bolo; ami sama leo me'is-sa, sama leo na'u fo nape'du;

⁶ nai fai fafain-na, ana moli fo nakapela tehu ana male nai fai le'donoson-na.

⁷ O nasa-melum tao nanggengek ami, ma mopo-mate, hu kande O nasa-melum.

⁸ O pe'da ami salam-ma, nai O matam, O mita ami sala-singom fo nananafunik-kala.

⁹ Ami maso'dam-ma, keke'uanak nanahu O nasa-melum, ami teum-mala nate'e sama leo ani hahaek-ka.

¹⁰ Ami faim maso'dam-ma losa ka'da teuk hituhulu, metema ami balakaik-ka soona, losa teuk faluhulu. Tehu ami hapuk-ka, nde ka'da toto'a-tataak ma doidosok-ka; basa ami maso'da keke'uanam-ma soona, ami sapu-lalo.

¹¹ See kande nalelak O nasa-melu matuainam-ma, ma name'da te'e-te'e no, O nasa-melum-ma, nenenin-na?

¹² Fe ami nasanene'dak, fo ami leke malelak ami fai maso'dam fo keke'uanak ia, fo ela ami da'di hataholi manatee-tenok.

¹³ Ou Manetualain, O mamanasa losa faihi'da? Fali ma'im-ma leona, fo sue-lai O atam-mala.

¹⁴ Nai fai fafain-na, tao mahenu ami dalem-ma nenik O susue-lalain fo ela ami mamahoko-setelee ma makamee nai ami fai maso'dam-ma dalek.

¹⁵ Fe ami ua-nale malole, fo belan-na sama no doidosok fo ami lu'a-lepan nai teu-teuk doidosok-ka dalek.

¹⁶ Matu'du O tatao-nono'im neu ami fo atam-mala, ma O koasam fo neni namahoko-seteleek fe ami tititi-nonosim.

¹⁷ Ou ami Amam Manetualain, ba'e-pala ami, fo ela basa ami ue-le'dim lala'ena, neni buna-boak.