MAZMUR 87 - Susula Malalaok Hehelu Palak Ma Hehelu Beuk

Kokoa-kikiok ba'eneu Yerusalem

¹ Teidalek Korah Kokoa-kikion-na, fo nakameek esa. Manetualain napadedek kotan-na, nai pupukun fo malalao-malalafun lain.

² Ana sue-lai-na Yerusalem ba'un-na seli, neme basa kota manai Israel-la.

³ Mamanene leon, hai Manetualain kotan-na, nafa'da dede'a matuaina-la, la'eneu o nae:

⁴ “Neukose Au sulak Masir ma Babel leo leoina fo, manatunga Au-a, susulan dale neu. Nakalenak, Filistea, Tirus ma Sudan, nanalekek leo laun Yerusalem-ma dalek leu.”

⁵ Ba'eneu Sion soona, neukose hataholi-a nafa'da, nae basa leoina fo, ala masok lai ndia laun-na dalek, ma nae Manetualain Fo Mademaina, neukose tao natea-nahelen.

⁶ Neukose Manetualain sulak leoina-la leo laun Yerusalem-ma, susulan dale neu.

⁷ Neukose ala longe ma lakamee lae, “Sion nde bee-na, au mamana dada'di-momoling!”