MAZMUR 86 - Susula Malalaok Hehelu Palak Ma Hehelu Beuk

Huhule-haladoik fo dokodoe tutulu-fafalik

¹ Dauk huhule-haladoin. Ou Manetualain, mamanene au huhule-haladoing, fo mataa au leona, nana au nuu ta-hata tak, ma tapandoes.

² Manea au so'dang-nga, nana O sue-lai au, soi-tefa-mala, O atam fo, namahele neu O.

³ O nde, au Manetualaing-nga, sue-lai au, ou Manetualain, nana nai fai katemak esa dalen-na, au hule-haladoi neu O.

⁴ Manetualain, tao mamahoko O atam-ma dalen-na, nana au tao au daleng-nga neu O.

⁵ Ou Manetualain, O malole ma O nau fe do'o do ampon, hataholi manahule-haladoi neu O-a, O sue-lai mahelen nenik susue-lalaik fo, ana sasi kao-kao.

⁶ Ou Manetualain, taoafik neu au huhule-haladoing, ma mamanene au hala dokodoeng fo, au oke tutulu-fafalik.

⁷ Nai fai makase'ek-ka, au hule-haladoi neu O, nana O mataa au.

⁸ Ou Manetualain, ta hapu lamatua daebafak sama leo O fa, ta hapu hataholi bisa tao hata fo, O taon fa.

⁹ O makadada'dik basa leoina-la, neukose ala mai, ou Manetualain, fo ala sene-do'ok neu O, ma ala koa-kio O matua-mademam.

¹⁰ Nana O makadelek, ma O tao manada'di beuk-kala, ka'da O nde Manetualain-na.

¹¹ Ou Manetualain, manoli O hihii-nanaum neu au, fo ela au tungan no lilinekak; taom-ma au fe ha'da-holomata neu O, no dale katematuak.

¹² Au oke makasi neu O, no dale katematuak, ou au Amang Manetualain; au nau koa-kio O matua-mademam, losa dodoon-na.

¹³ Nana O sue-lai mahele au, nenik susue-lalaik matuaina; O soi-po'i au samaneng-nga neme bolo mamates dale mai so.

¹⁴ Ou Manetualain, hataholi manakoao-ndaeaok-ka fo'a de ana sapu-na au, hataholi ha'da hataholi tak, bubuak esa, nau taolisa au; ala ta taoafik neu O fa.

¹⁵ Tehu O, ou Amak, Manetualain fo manasue-manalai, ta haelai namanasa, henuk no susue-lalaik, ma manalilinekak.

¹⁶ Taoafik ma sue-lai au, matetea-mahehele, ma soi-tefa-mala au, nana au boeo, akatele ma fe ha'da-holomata neu O, sama leo au inang boe.

¹⁷ Ou Manetualain, fe au O dale malolem-ma ta'du-tanan, fo ela hataholi manamakamuu-makadau au-a, ala mae, metema lita O tulu-fali, ma kokoe-nanasi au.