MAZMUR 83 - Susula Malalaok Hehelu Palak Ma Hehelu Beuk

Huhule-haladoik fo dokodoe tutulu-fafalik fo la'ban musu-a

¹ Asaf Kokoa-kikion: nakameek esa.

² Ou Manetualain, boso da'di hataholi hala taak, fo ta kokolak nalelak fa, boso ifa limam-ma fo ta tao hata esa boen.

³ Mitak O musum-ma napue nanseli, ma hataholi fo, lakamuu-lakadau O-a, laule-lapo'de.

⁴ Ala tutu'u eno ke'di-ndiuk soaneu la'ban O anam-mala; ma lakokolaok fo la'ban hataholi fo, O masulu-mahapak-kala.

⁵ Lafa'da lae, “Mai fo ata tao takalulutuk leoina Israel-la, fo ela boso boe nafandele na'den-nala bai.”

⁶ Leoina-la, teik esa-dalek esa, ma lakokolaok fo la'ban O, lae:

⁷ leoina Edom ma Ismael, hataholi Moab-pala ma Hagar;

⁸ leoina Gebal, Amon ma Amalek, leoina Filistea, boema laun Tirus-sala.

⁹ Asyur boeo nakabubua nos so, ala da'di Lot ei-liman tititi-nonosin.

¹⁰ Taos sama leo hataholi Midian-nala, sama leo Sisera ma Yabin neme Lee Kison-na,

¹¹ fo nanatao namopo-namatek neme En-dor so, de ala da'di pupuk soaneu dae-a.

¹² Tao sila mauli-malangan sama leo Oreb ma Zeeb, ne'e makatele sila manakoasan-na, sama leo Zebah ma Salmuna,

¹³ nanahu lafa'da basa lae, “Mai fo tangatuu-ta dae fo, Manetualain mamana leleon-na.”

¹⁴ Ou Manetualain, nggenggela-ngganggalis sama leo dae sopuk-ka, ma sama leo anin-na fuu neni ha'deaik-ka.

¹⁵ Sama leo ha'i-a na'a heni nula, ha'i pilak fo, na'a naputu letek-kala.

¹⁶ Usis menik O ani matuainam-ma, tao manggengek-kasa menik O ani-sangum.

¹⁷ Ou Manetualain, nemen-na fo, lakamumulu-lakamamaek-kasa, fo ela ala manaku O koasam-ma.

¹⁸ Nemen-na fo ala hapu mamaek, ma ala bii-lamata'u losa dodoon-na, nemen-na fo mates lai nakamumulu-nakamamaek-ka dalek.

¹⁹ Ela leo bee-na, ala bubuluk, ka'da O nde Manetualain Fo Mademaina, Manetualain, fo manakoasa basa daebafak-ka lala'ena.