MAZMUR 81 - Susula Malalaok Hehelu Palak Ma Hehelu Beuk

Nakameek nai lelek tao feta

¹ Soaneu mauli-malanga nakameek-ka. Tunga nakamek: Gitit. Neme Asaf mai.

² Makamee nakamee kokoa-kikiok ba'eneu Manetualain, fo ita be'i-balakain, eeki no namahoko-seteleek ba'eneu Yakob Manetualain.

³ Li'u tambur, so'uk nakameek, makaminak gambus ma kecapi no malole.

⁴ Fuu trompet, nai ita fai malolen-na, nai feta bula beuk ma bulak-ka nakatema.

⁵ Nana ndia da'di nakanenetek esa nai Israel, ma paleta esa, neme Yakob Manetualain-na mai.

⁶ Ana taon da'di nakeketuk esa, ba'eneu leoina Israel-la, nai lelek Ana tutulumatak, fo la'ban Masir. Au amanene dede'ak esa, tehu au ta alelak-kana fa nae,

⁷ “Au so'uheni lelepa mabela neme emi alum lain mai so, ma se'iheni olik-ka neme emi limam-ma mai.

⁸ Nai emi fai susam-ma dalek, emi maloo bou-bou, de Au soi-tefa-ala emi Au ataa emi neme mangguluk, fo mamanak Au ke'ke. Au so'ba su'dik emi neme oemata Meriba.

⁹ Mamanene Au hala nasanene'dang-nga, hai Au anang, Israel, fo ela leo bee-na, emi nau mamanene Au!

¹⁰ Nai emi dalek, boso hapu lamatua daebafa fe'ek boso sene-do'ok neu hataholi nusa dea-la lamatua daebafan-na.

¹¹ Au nde, emi Amam Manetualain fo manahela-nole emi kalua meme Masir mai. Lelek emi mamala'a, Au fe emi nana'ak.

¹² Tehu Au anang-ngala, ta nau lamanene Au fa, Israel ta nau tunga neu Au fa.

¹³ Hu ndia de, Au po'ilotak-kasa lalanga batu; nemen-na fo, ala tunga sila hihii-nanau mesan-na.

¹⁴ Ah, ela leo bee-na, Au anang-ngala nau lamanene Au, ela leo bee-na, ala nau tunga neu Au,

¹⁵ soona no hatematak ndia boe, Au tao-ala sila musun-na, nakatele, ma Au sengi basa sila musu noon-nala.

¹⁶ Hataholi fo, lakamuu-lakadau Au-a, neukose Au fes lakaluku-lakatele neu Au, neukose sila nanahukuk losa dodoon-na.

¹⁷ Tehu neukose, Au fe Au anang-ngala la'a gandum neulauk, ma Au fes lakabete, nenik fanioe nula.”