MAZMUR 80 - Susula Malalaok Hehelu Palak Ma Hehelu Beuk

Huhule-haladoik soaneu Israel

¹ Soaneu mauli-malanga nakameek-ka. Tunga nakameek: Laisona se'bang-nga. Asaf fe sakasii Kokoa-kikion.

² Ou Manafoo Israel, mamanene leona, te O nde mauli-malanga Yusuf tititi-nonosin da'di leo bi'ilopo bubuak-ka. O nde mangatuuk nai mahahae mali'dak nusa so'dak lain-na (kerub), to'da mai no mandela-masa'ak

³ nai Efraim, Benyamin ma Manasye matan-nala. Matu'du O koasam-ma neu ami, ma mai leona, fo soi-tefa-mala ami.

⁴ Ou Manetualain, tao mabebeu ami; mete ami nenik dale malole, soona neukose ami maso'da.

⁵ Ou Manetualain Fo Manakoasa, O mamanasa losa faihi'da, leomae O anam-mala hule-haladoi?

⁶ O fe ami kii-makaleleuk-ka, da'di nana'ak ma luuoe manati'ti boto-botok-ka, da'di nininuk.

⁷ O po'ilotak leoina titia-tataik-kala lale'a la'eneu ami daem-ma ami musum-mala hika no namahoko-seteleek.

⁸ Ou Manetualain, Fo Manakoasa, tao mabebeu ami; mete ami no dale malole fo ela ami maso'da.

⁹ O anam-mala, sama leo ai angol fo, O laliheok-kana neme Masir mai. O usiheni leoina fe'ek-kala, boema O sele ai ndia neu sila nusan-na.

¹⁰ O sadia fen dae, boema naoka; de okan-nala tola deman-na seli de nakapepela leo basa nusak-ka lala'ena neu.

¹¹ Ana nasulu-nahapan-na, pupukuk-kala, ma ana potin-na ai aras matuaina-la nenik ndanan-nala.

¹² Ndanan-nala, tapasosola losa Tasi Tala'dak, pe'dun-nala losa Lee Efrat-ta.

¹³ Ou Manetualain, tao le'e de, O tao matu'u pa'an-na, nalosa hataholi manala'ok tunga ndia, ala hapu seu boan-na?

¹⁴ Bafi fuik-kala totofin de nalosa nalutun, ma bana manai mook-kala, la'a henin.

¹⁵ Ou Manetualain, Fo Manakoasa, fali ma'im-ma leona, mete neme nusa so'dak-ka mai, fo taoafik neu O anam-mala.

¹⁶ Soi-tefa-ma, O anam fo, sama leo ai angol fo, O sele matam so, ma angol pe'duk-ka, O taom-man da'di balakaik.

¹⁷ Musu-a lo'on, de ana hotu henin; nemen-na fo, O nasa-melun tao namopo-namates.

¹⁸ Masulu-mahapa hataholi fo O hele basak-kala, ana hataholik fo, O tao balakain ba'eneu O

¹⁹ Soona ami ta heo meme O mai so'on; manea ami so'dam-ma, soona neukose ami koa-kio O.

²⁰ Ou Manetualain Fo Manakoasa, tao mabebeu ami leona, mete ami no dale malole, fo ela ami maso'da.