MAZMUR 75 - Susula Malalaok Hehelu Palak Ma Hehelu Beuk

Manetualain manakee-manafula mademaina

¹ Soaneu mauli-malanga nakameek-ka. Tunga nakameek: Boso tao mamopo-mamate. Asaf Kokoa-kikion. Nakameek.

² Ou Manetualain, ami sene-do'ok O, ami moke makasi neu O ma ami tui-benga O tatao-nono'i matuainam-ma.

³ Manetualain nafa'da nae, “Nai faik fo Au aketu basan so, neukose Au aketu-ala'di, tunga ndoos ma matetuk.

⁴ Metema daebafak-ka, nanggengo no basa laun-na soona, Au nde tao atetea-ahehele diin-nala.”

⁵ Soaneu hataholi fo, ana hii kokolak bafa louk-ka, Au afa'dan fo daenga boso boe kokolak bafa louk bai.

⁶ Ma soaneu hataholi manatao mangalauk-ka, Au afa'dan fo daenga, boso boe natu'du heo-hilu koao-ndaeaok bai. Boso namatutua-namadedema aoinan-na do kokolak no koao-ndaeaok.

⁷ Nana naketu-nala'dik-ka, ta mai neme dulu do muli mai fa, boeo ta neme kii do kona mai fa.

⁸ Tehu Manetualain mesak-kana nde naketu-nala'di-a Ana nakadadaek esa ma Ana so'ulaik fe'ek-kala.

⁹ Manetualain nasa-melun sama leo nggalas-sa nai liman dale, nggalas ndia, oe angol manalak-ka nai dalek, Manetualain po'a nggalas ndia isin-na, neu basa hataholi mangalauk manai daebafak-ka, fo muse linun losa basan.

¹⁰ Tehu neukose, au tui-benga ahele Yakob Manetualain-na, au akamee nakamee kokoa-kikiok ba'eneun.

¹¹ Neukose Ana helu la'di hataholi mangalauk-ka be'i-balakain, tehu hataholi malole-a, boetai mabe'i-balakaik.