MAZMUR 74 - Susula Malalaok Hehelu Palak Ma Hehelu Beuk

Huhule-haladoik soaneu leoina ao loan-na

¹ Asaf nakamee nanoli nafa'da. Ou Manetualain, O la'oela ami losa dodoon-na do? Tao le'e de, O mamanasa makandoo O anam-mala?

² Mafandendelek O anam fo, O heles neme makahulun eli mai, O soi-po'i leoina-kala, fo ela ala da'di O nuum. Mafandendelek Pupuku Sion fo, O taon da'di O mamana leleom-ma.

³ La'ok ndondolo mamanak fo, ala da'di ai-batu madodouk so; Musu-a tao nakalulutuk basa hata lala'en, manai O Umam-ma so.

⁴ O musum-mala, ala nggasi-nggasi mesan nai O Umam, ma lapadedeik dedeo sesengik-kala lai ndia.

⁵ Sila sama leo manalo'o ai-a, ana leuk takan-na, fo ana lo'o ai-la, nai nula dale.

⁶ Ala tao lakalulutuk, basa ai nanadoki-dulak-kala nenik taka ma ai papaluk.

⁷ Ala hotu heni O Umam-ma de tak-kana so; ma ala tao langgenggeo mamanak fo, sene-do'ok neu O-a.

⁸ Ala nau ami basa-basam-mala makatele neu sila, ma ala hotu heni basa uma mamasok mania nusak ia.

⁹ Ta mita nabi-nabi, ma manada'di beuk so'on, ma ta hapu hataholi esa boen, ana bubuluk, manada'di leoiak-ka, nakandoo losa faihi'da.

¹⁰ Ou Manetualain, losa faihi'da, musu-a hakinonoli O? Ala lakamumulu-lakamamaek O na'dem-ma, losa dodoon-na do?

¹¹ Tao le'e de, O ta tulu-fali seluk ami fa? Tao le'e de, O po'i O limam-ma neme ami mai?

¹² Ou Manetualain, neme makasososan mai-a, au maneng-nga nde O, O nde soi-tefa-mala ami-a.

¹³ O fa'a ba'e tasi-a, nenik O be'i-balakaim matuainam-ma, ma O tao maba'e buta tasi langan-nala.

¹⁴ O tao makalulutuk buta Lewiatan-na, langan-nala, de O taon da'di nana'ak ba'eneu hata fo manaleo nai moo solokaek-ka.

¹⁵ O nde fe oemata-la ma lee-la faa; O tao makamama'dak lee matua-la.

¹⁶ O nde makadada'dik lele'dok ma le'odaek-ka, boema O matu'du le'do no bulak-ka, mamanan-na.

¹⁷ O matu'du daebafak-ka, too-lanen-nala, O tao fai hanas ma fai oefaak.

¹⁸ Mafandendelek, tao leo beek de, musu-a nakamumulu-nakamamaek O, ou Manetualain, leoina fo ta lalelak O fa, lakamumulu-lakamamaek O na'dem-ma.

¹⁹ Boso fe O anam fo manamale-talek ia-la leo musu fo ha'da hataholi tak-ka, liman neu. Losa dodoon-na, boso mafandele heni O anam fo, ua-nalen-nala ta malole fa.

²⁰ Mafandendelek, hehelu-balataak fo, O taon no ami, nana hataholi-a tao naseti-nalakak-ka, nai basa mamana makahatuk manai nusak ia.

²¹ Boso po'ilotak hataholi nanatuni-ndenik-ka hapu mamaek, ela leo been-na, hataholi manadoi-dosok-ka, ma hataholi nuu ta-hata tak-ka, koa-kio O.

²² Ou Manetualain, fo'a leona, fo masala'e O dede'am-ma! Nana nai fai katemak esa dalen-na, hataholi fo ta lamahele O fa, lakamumulu-lakamamaek O.

²³ Boso mafandele heni O musum-mala ngganggasin-na, O musu noom-mala nakalupun-na boetai lapane'ek-ka!