MAZMUR 73 - Susula Malalaok Hehelu Palak Ma Hehelu Beuk

SUSULAK KA TELU MAZMUR 73–89 Manetualain ndoon ma matetun-na

¹ Asaf Kokoa-kikion. Tete'ek-ka, Manetualain malole ba'eneu anan-nala, ba'eneu hataholi fo, dalen-na neuisik.

² Tehu au daleng-nga, naba'e so, au namaheheleng-nga, isabain-na, mopon,

³ nana au ape'da dalek neu hataholi manakoao-ndaeaok-ka, ma nai lelek au ita hataholi mangalauk-ka, ua-nalen malole.

⁴ Nana ta lamahe'di-lapalau fa, aon-nala balakaik ma so'da-la'dak.

⁵ Ala ta hapu susa fa, ua-nale ta malole-a, ta la'e fas, sama leo hataholi fe'ek-kala.

⁶ Hu ndia de, latu'du heo-hilu koao-ndaeaok, ma ala tao no naseti-nalakak tataas esa.

⁷ Tatao-nono'i mangalauk-ka po'a-ngganga neme dalen-nala dalek mai; ala lakalupu ka'da tutu'u eno mangalauk.

⁸ Ala hakinonoli hataholi, ma no koao-ndaeaok, ala fe nasanene'dak mahelek lae sila sanga tuni-ndeni hataholi.

⁹ Ala lakamumulu-lakamamaek Manetualain nai nusa so'dak-ka, ma ala kokolak bafa louk, neu hataholi manai daebafak-ka,

¹⁰ nalosa Manetualain anan-nala boeo, lepos fali leo sila leu, de lamahele hataholi sila hala-kokolan.

¹¹ Lafa'da lae, “Manetualain ta bubuluk fa, Manetualain Fo Mademaina, ta nalelak fa”

¹² Hataholi mangalauk-ka, heo-hilun leondiak; so'dan-na nee-nee lino-linok, ma hata-heton boetai lamaba'uk-ka.

¹³ Palsuma la'iesak-kana, au anea au dale malalaong-nga; Sosoa-ndandaan ta, au dook-ka eme sala-singok-ka mai.

¹⁴ Nana nai fai katemak esa dalen-na, ua-nale ta malole-a, tuni-na au; tunga-tunga fafain-na, au nanafepa-li'uk.

¹⁵ Leouni'ka, au kokolak ae leondia soona, au ke'di-ndiu o anam-mala bobongin-nala.

¹⁶ Tehu, nai lelek au sanga enok, fo au alelak, dede'ak ndia tean-na seli, ba'eneu au.

¹⁷ Mate'en-na, au masok leo Manetualain Uman dale u, boema au alelak hataholi mangalauk-ka, so'da mate'en-na.

¹⁸ O fes lapadeik leu eno talimo'dis-sa, de O po'ilotak-kasa tu'u leu, de mopo-mates.

¹⁹ Ala lakalulutuk, nai hatematak esa dalen-na, sila so'da mate'en-na, neni bibii-namata'u matuaina.

²⁰ Sama leo me'is-sa, mopon nai fai fafain-na; lelek O fo'a mapadeik, ou Manetualain, boema sila boeo, mopok-kasa.

²¹ Lelek au ame'da au daleng-nga, ta tesa-tama fa, ma au daleng-nga, sama leo nanapapauk-ka,

²² au amanggoa, de au ta alelak fa, au sama leo bana, nai O matam-ma.

²³ Tehu au ahele nai O matam-ma, de O ho'u-ma, au lima konang-nga.

²⁴ O hela-nole au, nenik nanoli-nafa'dak, de makabuin-na, O sipok au no ha'da-holomata.

²⁵ See kande, au anuun nai nusa so'dak-ka, fe'ek neme O mai? Fe'ek neme O mai, ta hapu hata fo, au ahiik-kana nai daebafak-ka.

²⁶ Leomae au aopaa-samaneng male-tale, tehu O nde, au be'i-balakaing, ou Manetualain; O nde, basa hata lala'en, fo au anuun losa dodoon-na.

²⁷ Hataholi fo, ana la'oela O-a, neukose ana hapu soe, O tao mamopo-mamate hataholi fo, ana ta lilineka neu O fa.

²⁸ Tehu ba'eneu au soona, malole-na seli, au nai Manetualain boboan-na, Au tao Manetualain, da'di au mamana nasulu-nahapang, fo ela au hapu tui-benga tatao-nono'in lala'ena.