MAZMUR 71 - Susula Malalaok Hehelu Palak Ma Hehelu Beuk

Hataholi lasik-ka huhule-haladoin

¹ Ou Manetualain, au asulu-ahapa neu O boso po'ilotak lakamamaek au.

² Soi-po'i au leona, nana O ndoos ma matetuk, mamanene leona, fo soi-tefa-mala au.

³ Da'di sama leo lete batu ba'eneu au fo au mamana leleong-nga fo au losan tataas esa no mudak la'iesak-kana, Nana O maketu basa, soaneu soi-tefa-mala au, Au mamana nasulu-nahapang, ma mamana hahaeaong-nga nde O.

⁴ Ou au Manetualain, fe au atapo'i neme hataholi mangalauk-ka mai, neme hataholi fo, ha'da hataholi tak-kala, koasan-na mai.

⁵ Nana au namahehenang-nga nde O ou Manetualain, Manetualain, au amahele O, neme tepo lelek, au muli-solung-nga.

⁶ Nai au fai maso'dang-nga dalek, au asala'da neu O O makabobongik au neme au inang tein dale mai hu ndia de, au koa-kio O tataas esa.

⁷ Au so'dang-nga, da'di nana'dak ba'eneu hataholi makadotok, nana O nde, au manamasulu-mahapang fo, mabe'i-balakaik.

⁸ Au koa-kio O tataas esa, ma nai fai katemak esa dalek, au tui-benga O matua-mademam.

⁹ O boso tu'u-tapa heni au, nai au fai lasing-nga dalek, boso la'oela au, metema au be'i-balakaing ta so,

¹⁰ nana au musung-ngala, kokolak au, ma hataholi fo, ala nau taolisa au-a, ala tao nakabubua mangalauk.

¹¹ Lafa'da lae, “Manetualain la'oelan so; de mai fo, ata usin, fo ata ho'u-tan, nana ta hapu manasoi-tefa, fo soi-tefa fan.”

¹² Ou Manetualain, O boso dook-ka meme au mai, au Manetualaing-nga, tulu-fali au lai-lai.

¹³ Nemen-na fo, hataholi fo manasapu-na au-a, nananakamamaek ma nanatao namopo-namatek. Nemen-na fo, hataholi fo ana nau tao soe au-a, napangamak ma nakamumulu-nakamamaek-ka, poti nalan.

¹⁴ Tehu au amahena tataas esa neu O, ma boetai koa-kio O.

¹⁵ Nai fai katemak esa dalen-na, neukose au tui-benga O tatao-nono'im fo ndoos ma matetuk-ka, ma so'da-molek maneme O mai, ta hapu leke nala fan

¹⁶ Au koa-kio O tatao-nono'im fo makadelek-ka ou Manetualain fo Manetualain Manakoasa, au tui-benga O ndo ma matetum-ma, ka'da O ndoos ma matetuk.

¹⁷ Ou Manetualain, O manoli au neme tepo lelek au muli-solung-nga, losa besak ia, au tui O tatao-nono'im fo, manada'di beuk-ka.

¹⁸ Ou Manetualain, boso la'oela au, losa au amalasi fo au mofa, fo ela au tui-benga O koasam-ma, ma O makadelem-ma, neu bobongik manamaik-kala.

¹⁹ Ou Manetualain, O ndo ma matetum-ma, dema lalai; O tatao-nono'im-mala matuaina; see sama-na leo O?

²⁰ O fe au doi-doso mabela makadotok, tehu neukose, O tao mabebeu au be'i-balakaing, ma O mafofo'a falik au neme lates dale mai.

²¹ Neukose O taom-ma au nanafe ha'da-holomata lena seluk ma O kokoe-nanasi au seluk.

²² Au sanga koa-kio O nenik gambus, nana O lilineka, ou au Manetualaing-nga. Au nau akamee, nakamee kokoa-kikiok ba'eneu O, nenik kacapi, ou Israel Manetualain fo malalao-malalafuk.

²³ Au eking-nga henuk no namahokok, ma au akamee, nakamee kokoa-kikiok ba'eneu O Au aopaa-samaneng, nakamee no namahokok, nana O soi-tefa basa au so.

²⁴ Nai fai katemak esa dalek, neukose au tui-benga O ndo ma matetum-ma, nana hataholi fo ala nau tao soe au-a, ala kala ma ala hapu mamaek so.