MAZMUR 68 - Susula Malalaok Hehelu Palak Ma Hehelu Beuk

Nakameek sesengik

¹ Soaneu mauli-malanga nakameek-ka. Dauk Kokoa-kikiok.

² Manetualain fo'a, de Ana tao tapasasala musun-na, hataholi fo ta lahiik-kana fa, lalai leme matan-na mai.

³ Manetualain usis henis, de ala la'o, sama leo anin-na fuu ha'imasuk-ka de mopon sama leo lilik-ka faa nai ha'i dale, leondiak boe, hataholi mangalauk-ka, mopok-kana neme Manetualain matan-na mai.

⁴ Tehu hataholi manatao malole-a, namahoko-setelee, ala eeki no namahokok nai Manetualain matan.

⁵ Makamee ba'eneu Manetualain, ma koa-kio na'den-na, Sadia eno okofoo ba'eneu Ndia fo, manasa'e ko'as-sa. Na'den-na Manetualain – mamahoko nai matan-na leona!

⁶ Manetualain fo manaleo nai Uma malalao-malalafun-na nde bee-na, anamak-kala aman, ma manamasala'e faluina-la.

⁷ Manetualain sadia mamana leleok fe hataholi fo, maleu-malak-ka: Ana soi-po'i hataholi nanahukuk-kala, nalosa ala laua-lanale. Tehu hataholi manala'ban Manetualain-na, muse ana leo nai dae tokotiik.

⁸ Ou Manetualain, lelek O hela-nole O anam-mala, la'ok tunga mook fo, oe ta ndia fa,

⁹ daebafak-ka dele, nakalenak u'dan-na mai nai O matam-ma, nanahu Manetualain Sinai, fo Israel Manetualain mamain-na.

¹⁰ O fe u'daina mai, ma O tao mabebeu O dae tokotiim-ma.

¹¹ Boema O anam-mala leo lai ndia; fo nai O dale malolem-ma dalek, ou Manetualain, O makaboboi hataholi nuu ta-hata tak-ka.

¹² Manetualain fe paleta, boema basa inak-kala lini halak lae:

^13-14 Manek-kala loo solda'dun-nala, lalai so!” Ala lalai sama leo manupui kalua ana laa fo nalai. Basa inak mania uma-la, ala baba'e, lilofulak ma lilopilas nanala'o elak-kala. Leomae Manetualain anan-nala, makadotok ta tunga natee-natatik-ka fa, tehu ala sengi.

¹⁵ Lelek Manetualain Fo Manakoasa tao tapa sasala mane-manek manai naa-la, salju faa neme Lete Salmon-na mai.

¹⁶ Lete Basan-na nde bee-na, letek fo anseli, letek fo leteanak makadotok lai poin-na.

¹⁷ Tao le'e de, neme o leteana makadotom manai o poim-ma ndia, o mete no nape'da dalek neu Pupuku Sion fo Manetualain helen, da'di mamana leleon-na? Neukose Manetualain leo nai naa losa dodoon-na.

¹⁸ No kaleta matea-mahelek lifu-lifuk-kala, Manetualain mai nai sila tala'da nai matua-mademan-na dalek.

¹⁹ Manetualain kae leo mamanak madema neu; noo hataholi nanafook makadotok. Ana sipo tunu-hotuk neme hataholi daebafak-ka tala'da mai, nakalenak neme teidalek manalena-la'ban-nala tala'da mai; fo ela ala leo sama-sama loo Manetualain fo Manetualain Manakoasa.

²⁰ Koa-kio Manetualain leona, nana Ndia nde Manetualain, fo manasoi-tefan-na ita; Ana lepa ita bela-ba'un, neme faik leo faik neu.

²¹ Ita Manetualain nde bee-na, Amak fo manasoi-tefa, Ana soi-po'i ita neme mamates-sa mai.

²² Tao leo bee-o, neukose Manetualain tao nakalulutuk musun-na, langan-na, ma hataholi fo, naso'da nakandoo nai sala-singok-ka dalek.

²³ Manetualain nafa'da nae: “Hai Au anang-ngala lemin, Au eni emi musum-ma, neme Basan mai Au eni falik-kasa leme tasi buin-na mai,

²⁴ fo ela emi safe emi eim-ma nenik sila daan-na, ma emi busam-mala lalamemei losa ala doak.”

²⁵ Basa-basas lita O sesengim-ma, ou Manetualain, Hataholi-la beenongo, fo loo au Manetualaing-nga, au Maneng-nga leo mamana leleon-na neu.

²⁶ Basa manamakameek-kala, la'ok lai uluk, basa manamakaminak kecapi-la, lai dea; basa anafe'oanak manali'u tambur, lai tala'da; sila nakameen-na leo iak:

²⁷ “Koa-kio Manetualain, nai anan-nala masene-do'ok tala'da, koa-kio Manetualain, hai Yakob tititi-nonosin-nala lemin!”

²⁸ Benyamin nde bee-na, leo fo anak nanseli, ana la'ok nai uluk boema basa lasi-lasi Yehuda-la tunga ma basa lasi-lasik Zebulon ma Naftali-la, lai dean-na.

²⁹ Emi Manetualaim-ma, noke emi be'i-balakaim; ou Manetualain, matetea-mahehele hata fo O tao basan soaneu ami so.

³⁰ Mane-manek-kala lini tunu-hotuk fe O nai O Umam manai Yerusalem-ma.

³¹ Tao manggenggek Masir leona, fo bana makaa-makisuk ndia, nai tasi gelagah tala'da. Kena-ka'i leoina-la, fo banteng bubuak ndia no anan-nala, fo esa heheta-aa'i esa soaneu hapu lilofulak. Manetualain tao tapasasala leoina fo ala hii latee-latati.

³² Hataholi matua-madema Masir-ra, ala mai de leni liti; hataholi Sudan-nala, belai leni bea leo Manetualain neu.

³³ Makamee ba'eneu Manetualain leona, hai basa nusak-kala lemin, makamee nakamee kokoa-kikiok ba'eneu Manetualain,

³⁴ ba'eneu Ndia, fo Ana la'ok tunga lalai maloa makahulun eli. Mamanene! Manetualain kokolak, de halan-na, belan-na seli.

³⁵ Manaku Manetualain koasan-na lole-napun, hapun nai Israel lain, koasan-na, nai ko'as-sala dalek.

³⁶ Tete'ek-ka, ita Manetualain-na, anseli nai lelek Ana kalua neme mamana leleon-na mai. Israel Manetualain-na, Ana fe anan-nala koasa ma be'i-balakaik. Koa-kio Manetualain leona!