MAZMUR 65 - Susula Malalaok Hehelu Palak Ma Hehelu Beuk

Kokoa-kikiok ma makasi

¹ Soaneu mauli-malanga nakameek-ka. Dauk kokoa-kikiok. Nakameek.

² Ami muse koa-kio O nai Sion, ou Manetualain, ma ami tao matetu ami hehelu-balataam neu O-a.

³ Nana, O nde sipok, huhule-haladoik-kala; basa hataholi-la, ala mai leo O mai, nanahu lasala-lasingo so.

⁴ Au sala-singong, belan-na seli, ba'eneu au, tehu O fe do'o do ampon neun.

⁵ Maua-manalek ba'eneu hataholi fo, O helek-ka, ma O maloon, fo ana leo nai O Umam. Ela leo been-na, ami makabete menik basa hata malole manai O Umam-ma, fo O mamana leleo malalao-malalafum-ma.

⁶ O mataa ami, nenik O fe ami sesengik, O tao dede'a manada'di beuk-kala, soaneu O soi-tefa-mala ami! O nde namahehenak ba'eneu basa leoina lala'en-na, losa tasi maloaina manai dook eli.

⁷ O taom-ma, letek-kala lapadeik latetu, nenik O be'i-balakaim, soaneu O matu'du O koasam fo makadelek-ka.

⁸ O tao makamate tasi maloaina ngguun-na, ma lii mapoponuk-ka, ma O tao matenak heni, leoina fo, manatao tasi'bu-la.

⁹ Basa laun daebafak-ka, ala bii-lamata'u ma fe ha'da-holomata lelek lita O tatao-nono'i matuainam-ma. O taom-ma, basa daebafak-ka lala'ena, neme bu'uk leo bu'uk neu-a, ala eeki-latadale.

¹⁰ O makaboboi, ma O fe u'dan neu dae ndia, O taom-ma dae ndia nalole, nalosa buna-boan sasi kao-kao. O fe lee-la, oen-nala makadotok, O sadia fes gandum hei, O sadia-ma, leondiak:

¹¹ O fe oelolok-kala faa, fo lakauuk, O fe oe faa leo daebubuak-kala, fo lakalulutuk. O fufu'a daen-na nenik u'dan, ma O fe bubu'u-palusan moli no malole.

¹² Hu kande, O dale malolem-ma, de tunga teuk O sadia keketu-kokoluk; O tunga bee soona, hapu manasasi kao-kaok-ka.

¹³ Bi'ihii bi'ilopo, henu moo solokaek-ka, basa pupukun-nala, lamahoko-setelee.

¹⁴ Mook mana'uk-kala, henuk no bi'ilopo, bafak-kala henuk no gandum. Basa-basas eki ma lakamee no namahoko-seteleek.