MAZMUR 63 - Susula Malalaok Hehelu Palak Ma Hehelu Beuk

Dalen-na nahiik neu Manetualain

¹ Dauk kokoa-kikiok, nai lelek nai moo solokaek Yehuda.

² Ou Manetualain, au Manetualaing-nga nde O, au sanga ma ahiik O. Sama leo dae tokotik-ka, ana maa ma'da oe, leondiak boe, au maa ma'da neu O.

³ Nemen-na, fo au mete O, nai O Umam, fo au ita O be'i-balakaim, ma O matua-mademam.

⁴ O susue-lalaim belin-na, lena heni maso'dak-ka, hu ndia de, au koa-kio O.

⁵ Au oke makasi neu O, nai au fai maso'dang-nga dalek; au so'uk au limang-nga neu O, boema au hule-haladoi,

⁶ No eeki-natadalek, au koa-kio O, nana O tao mamahoko au samaneng-nga, sama leo nenik nana'a mala'da.

⁷ Lelek au akandondoo nai pepe'uk lain, au afandele neu O; le'odae katemak esa dalen-na, au dodoo-tatai neu O,

⁸ nana O nde manatulu-fali basa au-a; au akamee no namahokok, nai O li'da susuem-ma dalek.

⁹ Au ho'u ahele O, de O limam-ma tia-to'ba au.

¹⁰ Tehu hataholi fo, ana nau taonisa au-a, neukose ana kona leo hataholi manamatek-kala daebafan dale neu.

¹¹ Neukose mates lai natee-natatik dale, fo ala da'di bana makaa-makisuk-kala nana'an.

¹² Neukose manek-ka namahoko-setelee, nanahu Manetualain tutulu-fafalin; hataholi fo, ana soo nenik Manetualain na'den-na, neukose namahoko, tehu hataholi masapepeko-masandandalik-ka bafan-na, neukose nanasule ketuk.