MAZMUR 59 - Susula Malalaok Hehelu Palak Ma Hehelu Beuk

Huhule-haladoik fo dokodoe nasulu-nahapak

¹ Soaneu mauli-malanga nakameek. Tunga nakameek: Boso tao mamopo-mamaten. Dauk kokoa-kikion-na, nai lelek Saul nadenu hataholi neu maku uman-na fo taonisan.

² Ou au Manetualaing-nga, soi-tefa-ma au neme au musung-ngala mai, masulu-mahapa au neme hataholi fo manasapu-la au-a.

³ Soi-po'i au neme hataholi fo manatao tatao-nono'i mangalauk-ka mai, fe au ala deak neme hataholi kanisak-kala mai.

⁴ Mitak, lasasalematak lo au fo ala sanga taolisa au, hataholi dale susue-lalai taak-kala lakabubua fo la'ban au; te se'kona, ta hu kande au tao basa sala-singok so, do au tao tatao la'olenak so, ou Manetualain.

⁵ Boeo, ta hu kande au salang-nga fa, lasi'a fo laheheleaon.

⁶ Fo'a leon, Manetualain Fo Mademaina, fo tulu-fali au. Ou Israel Manetualain, O mita matam leona, Fo'a fo huku leoina-la leona, Boso sue-lai hataholi mangalauk fo manamalelesik.

⁷ Nai fai le'donoson-na, ala fali ma'is, ala nggoo sama leo busa, fo ala la'ok okofefeo kota.

⁸ Ala kokolak holo lakandoo, ma lakamumulu-lakamamaek; hala-kokolan-nala matane sama leo tafaina, laedaenga, ta hapu hataholi namanene fa.

⁹ Tehu O hikas, ou Manetualain, O hakinonoli basa leoina sila-la.

¹⁰ O nde au be'i-balakaing, de au amahena neu O, O da'di au mamana nalaing-nga ou Manetualain.

¹¹ Nanahu dale malolen-na, de au Manetualaing-nga mai neu au, Ana po'ilotak au mete au musung-nga kala.

¹² Boso taomisas ou Manetualain, fo ela au leoinang-nga boso nafandele henin. Tao tapasasalas ma sengis menik O koasam-ma, ou Manetualain fo ami manamasulu-mahapam.

¹³ Nana sila lasala-lasingo lenik hala-kokolan-nala; Nemen-na fo hihi'ik-ka nalas nai koao-ndaeaon-nala dalek, nanahu ala nau soo-supa ma lasapepeko-lasandandali.

¹⁴ Tao mamopo-mamates nai O nasa-melun dale, ou Manetualain, tao mamopo-mamates losa basa la'iesak-kasa. Soona hataholi-a esa-esak, bubuluk nae Manetualain paleta Israel, ma paletan-na namaloa nai daebafak-ka lala'ena.

¹⁵ Nai fai le'donoson-na, ala fali ma'is, ala nggoo sama leo busa, boema ala la'ok okofefeo kota.

¹⁶ Laleu-lalaak sanga nana'ak, ma ala nggoo, metema ta lakabete fa.

¹⁷ Tehu au akamee la'eneu O bei-balakaing; tunga-tunga fafain-na, au akamee apane'e la'eneu O susue-lalaim, ma O lilinekam. Nana O nde au mamana nalaing-nga, au mamana nasulu-nahapang, nai fai toto'a-tataan-na.

¹⁸ Ou Manetualain, fo au be'i-balakaing, au akamee nakamee kokoa-kikiok ba'eneu O, nana, au mamana nasulu-nahapang-nga nde O. Ou Manetualain, fo au susue-lalaing-nga.