MAZMUR 51 - Susula Malalaok Hehelu Palak Ma Hehelu Beuk

Huhule-haladoik fo dokodoe do'o do ampon

¹ Soaneu mauli-malanga nakameek. Kokoa-kikiok fo Dauk taon

² ndek lelek Nabi Natan-na kena-ka'i basan, nanahu ana hohonge no Batsyeba.

³ Sue-lai au, ou Manetualain, nanahu O sue-lai mahele au, lose heni au sala-singong nanahu O susue-lalai matuainam-ma.

⁴ Safe-saa au tatao-nono'i mangalaung lala'ena; tao balisi au neme au sala-singong-nga mai.

⁵ Nana au manaku au salang-ngala, au afandendelek au sala-singong tataas esa.

⁶ Soaneu O, ka'da soaneu O mesam-ma, au asala-asingo, ma au tao hata fo O mafa'da mae mangalauk. Hu ndia de, nandaa O huku au, O naketu-nala'dim, ndoos ma matetuk.

⁷ Tete'ek-ka, au hataholi mangalauk neme lelek bongi au-a, ma au inang nailu au-a nai sala-singok-ka dalek.

⁸ O mahiik dale ndoos-sa; tao mahenu au daleng-nga nenik O manatee-tenom-ma.

⁹ Malalao-malalafu au, soona neukose au balisi; Safe-saa au, soona neukose au fulak lena heni a'bas-sa.

¹⁰ Nemen-na fo, au amanene halak namahokok-ka, fo ela au daleng fo O tao makalulutuk-kana ia, ana eeki-natadale seluk.

¹¹ Lepos masafali O mata-panam neme au sala-singong mai, ma lose heni basa au salang-ngala lala'ena.

¹² Makadada'dik dalek fo, neuisik ba'eneu au, ou Manetualain, tao mabebeu au daleng-nga nenik manggatek fo matea-mahelek.

¹³ Boso tu'u-tapa heni au neme O matam-ma mai, ma boso ho'i falik O dula dale malalao-malalafum-ma neme au mai.

¹⁴ Fe au amahoko-setelee seluk, nanahu so'da-molek fo neme O mai, fe au dalek fo ana nau tunga neu O.

¹⁵ Soona neukose au anoli O paletam-ma neu hataholi masala-masingok-ka, fo ela ala fali ma'is leo O mai.

¹⁶ Soi-tefa-ma au neme mamates-sa mai, ou Manetualain, fo au manasoi-manatefang-nga, soona neukose no namahoko-seteleek, au tui-benga O ndoo-matetum.

¹⁷ Ou Manetualain, tulu-fali au kokolak, soona neukose au koa-kio O.

¹⁸ O ta mahiik tutunu-hohotu nanado'dok fa; leo uni'ka, au tunu-hotu tutunu-hohotu nanatunuk soona, O ta mahiik-kana fa.

¹⁹ Tutunu-hohotuk fo ba'eneu Manetualain-na, nde been-na dalek fo nakalulutuk, dalek fo nakatele ma tuka tei-sale dalek-ka O ta tipa fan.

²⁰ Ou Manetualain, matu'du O dale malolem-ma neu Sion, mafofo'a falik Yerusalem papala nanadaman-nala.

²¹ Boema neukose O mahiik sipo tutunu-hohotuk fo kandaak, tutunu-hohotu nanatunuk ma tutunu-hohotu katemak sapi mane-a, neukose nanatunu-hotuk nai O mei tutunu-hohotum lain.