MAZMUR 5 - Susula Malalaok Hehelu Palak Ma Hehelu Beuk

Huhule-haladoik fo dokodoe nasulu-nahapak

¹ Soaneu mauli-malanga makameek-ka. Nenik nakaminak kinuk. Dauk kokoa-kikion-na.

² Ou Manetualain, mamanene au hala-kokolang, taoafik neu au hoo-nggu'ung.

³ Taoafik neu au dokodoeng ma tulu-fali au, ou au Maneng ma au Manetualaing-nga.

⁴ Nana au hule-haladoi ka'da neu O, ou Manetualain, mamanene au dokodoeng-nga, nai fai fafain-na. Fafai-fafain-na, au uni au tunu-hotung ma au ahani o natataam-ma, ou Manetualain.

⁵ O Manetualain fo ta mahiik tatao-nono'i mangalauk-ka fa; hataholi mangalauk-ka ta bole mai leo O mai fa.

⁶ O ta makatatakak mete hataholi manakoao-ndaeaok-ka fa, O ta mahiik hataholi manatao tatao-nono'i mangalauk-ka fa.

⁷ O tao mamopo-mamate hataholi fo ana hii nasapepeko-nasandandali, manatipu-daik ma kanisak-ka, O makadadaek-kasa.

⁸ Tehu, hu kande O susue-lalai matuainam-ma, au bole masok leo O Umam dale u. Au sene-do'ok asale leo O Uma malalao-malalafum-ma neu, ma au sene-do'ok O no manatee-tenok.

⁹ Ou Manetualain, au musung-ngala makadotok! Hela-nole au fo tao-no'i O hihii-nanaum, ma matu'du O enom fo au muse tungan.

¹⁰ Nana au musung-nga hala-kokolan, ta hapu nananamahelek fa; sila dalen-nala henuk no tutu'u eno mangalauk. Sila hala-kokolan makeek, tehu sila dalen-na, henuk no kaboo-kabalik.

¹¹ Hukus leon ou Manetualain, nemen-na fo ala hapu soe, hu kande sila dale tutu'u mesan-na. Usi henis leona, nanahu sila sala-singon makadotok nana ala lena-la'ban O so.

¹² Sa'di leo been-na, basa hataholi fo, lasulu-lahapa leu O-a, lamahoko-setelee ma eeki-latadale losa dodoon-na. Masulu-mahapa hataholi manasue-lai O-a, fo ela lamahoko hu kande O.

¹³ Hu Kande O tulu-fali hataholi fo mana Sue O, O masalaes tunga O dale susuem-ma.