MAZMUR 47 - Susula Malalaok Hehelu Palak Ma Hehelu Beuk

Manetualain Manakoasa Matua-madema

¹ Teidalek Korah kokoa-kikion-na. Soaneu mauli-malanga nakameek.

² Totoko limam-mala no namahoko-seteleek leona, hai leoina-la lemin! Koa-kio Manetualain nenik eeki-natadalek!

³ Nana Manetualain Fo Mademaina nde been-na, anseli nanseli, Mane Matua-madema fo manakoasa daebafak-ka lala'ena.

⁴ Ana fe ita sesengik neu leoina-la, Ana tao ita da'di manakoasa neu leo-leo ma leoina-la.

⁵ Ana hele fe ita, ita dae pusakan-na, dale namatuak ba'eneu leoina fo Ana sue-lain.

⁶ Manetualain sa'e kandela manen-na so, de eeki-natadalek ma pupuu liik-kala tungan.

⁷ Makamee nakamee kokoa-kikiok ba'eneu Manetualain leona, makamee nakamee kokoa-kikiok ba'eneu ita Manen-na!

⁸ Manetualain nde been-na, Manek nai daebafak-ka lala'ena, koa-kion nenik nakameek fo, henuk no nanolik!

⁹ Manetualain nangatuuk nai kandela manen fo, malalao-malalafun lain; Ana paleta leoina-kala.

¹⁰ Basa mauli-malangan leoina-kala, lakabubua, da'di leo Manetualain, fo Abraham sene-do'ok-ka, anan-nala. Nana Manetualain nde been-na, Manek nai basa manek lala'ena, Ndia matua-madema ma mandela-masa'ak nanseli.