MAZMUR 46 - Susula Malalaok Hehelu Palak Ma Hehelu Beuk

Manetualain nonook ita ma tulu-fali ita

¹ Teidalek Korah kokoa-kikion-na. Soaneu mauli-malanga nakameek. No Alamot nakameen-na.

² Manetualain nde been-na, ita manamasulu-mahapan, ma ita be'i-balakain. Naheheleaon tataas esa, ma Ana tulu-fali nabe'i ita, nai to'a-taak-ka dalek.

³ Hu ndia de, ita ta bii-tamata'u fa, leomae daebafak-ka nanggengo, ma letek-kala bolo leo tasi maloaina buin-na leu;

⁴ leomae tasi fo'a, fo lii-la lapoponu, ma pupukuk-kala dele, hu kande fefepa-lili'un.

⁵ Hapu lee manafaak fo tao lamahoko-setelee Manetualain kotan-na, Manetualain Fo Mademaina mamana leleon-na.

⁶ Manetualain leo nai naa, hu ndia de, neukose kota ndia ta nakalulutuk fa; neukose Ana tulu-falin, nai lelek le'do-a tii.

⁷ Manetualain nanggulu, boema daebafak-ka nakalulutuk; leoina-la lakalupu, nusak-kala lakalulutuk.

⁸ Manetualain Fo Manakoasa nonook ita, Yakob Manetualain-na, nasulu-nahapa ita.

⁹ Mai, fo mete hata fo Manetualain tao-no'in; tatao-nono'in nanadodoo-doak nanseli nai daebafak-ka!

¹⁰ Ana tao nate'e natee-natatik-ka nai daebafak-ka lala'ena, Ana tao nakalulutuk kokouk-kala ma tee-dongi, Ana hotu heni babaa fana bobongok-kala.

¹¹ Nafa'da nae, “Natee-nata'tik-ka, nate'e leona; bubuluk leona, te au ia Manetualain, Au matua-madema nai leoina-la tala'da matua-madema nai daebafak-ka lala'ena.”

¹² Manetualain Fo Manakoasa, nonook ita, Yakob Manetualain-na, nasulu-nahapa ita.