MAZMUR 45 - Susula Malalaok Hehelu Palak Ma Hehelu Beuk

Nakameek nai manek-ka feta ka'bing-nga

¹ Teidalek Korah kokoa-kikion-na. Nakamee susue-lalaik. Soaneu mauli-malanga nakameek. Tunga nakameek-ka liin-na: Laisona se'ba.

² Dede'a-kokola mana'ahiik-kala, lua ponu-ponu neme au daleng dale mai, au akamee fe manek-ka, au nakameeng-nga. Sama leo hataholi bini esa engen-na, au maang-nga naheheleaon kokolak bini.

³ O nde ao makadelek nanseli, nai hataholi daebafak-ka tala'da, o hala-kokola henuk no malole, hu ndia de, Manetualain ba'e-pala o losa dodoon-na.

⁴ Pa'a o tafainam-ma neu o kale'bom-ma, hai manek fo ao makadelek-ka nei, o matua-madema nanseli, ma manahika-humek!

⁵ Tutulumatak no napalanik leo tetu-temak-ka muu, matee-mata'ti soaneu hapu ndoos-sa, ma ndoos ma matetu mangana'uk-ka; no o be'i-balakaim, loso-ma sesengik matuaina!

⁶ O kou-kou isi matanem-ma, ana tola o musum-ma bade'en-na, leoina-na tu'u leu nai o ei tata'bu daem-ma.

⁷ Manetualain fe o koasa soaneu paleta, o koasam-ma nakatatakak losa dodoon-na; no ndoos ma matetuk, o paleta o laum-ma.

⁸ O sue-lai ndoos-sa, ma o ta mahiik mangalauk-ka fa; hu ndia de, Manetualain, fo o Manetualaim-ma, hele basa o so, ma Ana fe o maua-manale lena heni mane fe'ek-kala.

⁹ O papake-ngganggaom naboo laluteik, gaharu ma kainituk; manamakaminak sasanu manai uma manek ngga'di dui-a, tao-la o mamahoko.

¹⁰ Hapu manek-ka anafe'on-nala, nai uma manek-ka ata inaanan-nala dalek, Ina manek-ka napadeik nai kandela manek-ka boboan kona no ana pake lilo-henu isik.

¹¹ Hai ina maneana nei, mamanene au dede'a-kokolang, boso mafandele o leoinam-ma, ma o tia-laim-mala.

¹² O mata makeem-ma, tao natu'da manek-ka dalen-na, o tuam-ma nde ndia, de makatele neun.

¹³ Laun Tirus-sala leni tunu-hotuk ba'eneu o; hataholi kamasu'ik-kala sanga enok ho'i o dalem-ma.

¹⁴ Manek-ka anafe'eon masok no lole-napuk, ba'dun-na nanaseu lilopilas.

¹⁵ Loon leo manek-ka neu no ana pake papake-ngganggao dula mata-matak, basa anafe'oana matatema-la, tia-lain-nala tunga loon, sila boeo soaneu manek-ka.

¹⁶ Ala eeki-latadale no namahokok, nai lelek loon leo manek-ka, uma manen dale neu!

¹⁷ O, fo au maneng-nga, neukose o hapu anatouk makadotok, fo langatuu o bei-ba'i kaim-mala kandela manen-na. Neukose o taos da'di manakoasa neu daebafak-ka lala'ena.

¹⁸ Au koa-kio o tititi-nonosim nenik nakameek ia, neukose basa leoina-la koa-kio o, losa dodoon-na.