MAZMUR 42 - Susula Malalaok Hehelu Palak Ma Hehelu BeukSUSULAK KA DUA: MAZMUR 42–72 Huhule-haladoik nai mamana tu'u-tapak 1 Soaneu mauli-malanga nakameek. Leo-ingu Korah nakamee nanolin-na. 2 Sama leo nusa nahiik oe lee-a, leondiak boe au samaneng-nga nahiik O, ou Manetualain. 3 Au ahiik Manetualain fo maso'dak, faihi'da au bole u sene-do'ok nai Uman-na? 4 Lele'do-le'odaen au kii, luu oe-a da'di au nana'a-nininung. Fai katemak esa dalen-na, au musung-nga natane, “O Manetualaim-ma nai bee?” 5 Au daleng-nga he'dis-sa, metema au afandele fai makahulun-na, lelek au u leo Manetualain Uman sama-sama o hataholi makadotok, fo tao fai malole. Au la'ok nai hataholi fo langanongo-a uluk no eeki-natadalek ma nakamee kokoa-kikiok. 6 Tao le'e de au daleng-nga he'dis-sa, ma ta tesa-tama fa? Au amahena neu Manetualain. Boema neukose au oke makasi seluk neun, neu au Manetualaing-nga ma au manasoi-manatefang. 7-8 Nai mamana okak ia, au daleng-nga nakalulutuk, hu ndia de, au afandele neu Manetualain. Au samaneng-nga bolo nai faa dale he'dik dale faa tasi'bu-a sa'e-na au; sama leo Lee Yarden-na oe lili'don-na nggun-na neme Lete Hermon ma Lete Mizar-ra mai. 9 Sa'di leo been-na, Manetualain natu'du susue-lalain nai fai lele'don-na fo ela nai fai le'odaen-na, au hapu akamee, ma hule-haladoi neu Manetualain fo au oemata maso'dang-nga. 10 Au afa'da Manetualain fo au manamasala'eng-nga ae, “Tao le'e de, O mafandele heni au? Tao le'e de, au muse doi-doso akandoo, hu kande au musung-ngala tuni-ndenin do?” 11 Au daleng-nga nakalulutuk, nanahu musu-a hakinonolin-na. Ala latane lakandoo lae, “O Manetualaim-ma, nai bee?” 12 Tao le'e de, au daleng-nga he'dis-sa, ma ta tesa-tama fa? Au amahena neu Manetualain. Hu ndia de, neukose au oke makasi seluk neun, neu Manetualain, fo au manasoi-manatefang-nga. |
LAI 2018
Indonesian Bible Society