MAZMUR 41 - Susula Malalaok Hehelu Palak Ma Hehelu Beuk

Huhule-haladoik fo dokodoe lelea-hahai

¹ Soaneu mauli-malanga nakameek. Dauk kokoa-kikion-na.

² Mua-manalek ba'eneu hataholi fo ana taoafik neu hataholi tapandoes-sa; neukose Manetualain tulu-falin nai fai toto'a-taan-na dalek.

³ Neukose Manetualain nasulu-nahapan ma nakaboboin, neukose Ana fen ua-nale malole nai daebafak-ka, ma Ana ta fen leo musun-na liman dale neu fa.

⁴ Neukose Manetualain tulu-falin nai lelek namahe'di-napalau, de Ana tao nalea-nahai.

⁵ Auafa'da ae, “Au asala-asingo basa neu O so, ou Manetualain, sue-lai au ma tao malea-mahai au.”

⁶ Au musung-nga kokolak hata fo mangalauk la'eneu au, lahiik fo ela au mate, ma nananafandele henik.

⁷ Hataholi manadonge-dama au-a, dalen-nala ta ndoos fa. Ala kokolak dede'a ta malole la'eneu au, boema ala tui-bengan su'di leo bee neu.

⁸ Basa hataholi fo manamakamuu-makadau au lamakukutuk; ala kokolak hata fo ta malole nanseli la'eneu au.

⁹ Lafa'da lae, “He'din-na belak-ka nanseli, de ana ta bisa fo'a so'ok.”

¹⁰ Nakalenak au tia-laing fo au amaheles anseli, hataholi fo la'a lakabubua loo au-a, lakadadaek au so.

¹¹ Ou Manetualain, sue-lai au, tao malea-mahai au leona, fo ela au hapu balas au musu noong-ngala, tatao-nono'i mangalaun-nala.

¹² Metema musu-a, ta sengi au fa soona, au bubuluk ae O mook au.

¹³ O tulu-fali au, nanahu au daleng-nga ndoos, ma ana tao-na au aso'da sama-sama o O, losa dodo-na.

¹⁴ Koa-kio Manetualain, fo Israel Manetualain-na! Koa-kion neme besak ia, losa dodoon-na! Da'di tao leondiak leona. Amin!