MAZMUR 40 - Susula Malalaok Hehelu Palak Ma Hehelu Beuk

Huhule-haladoi makasi ma dokodoek-ka

¹ Soaneu mauli-malanga nakameek-ka. Dauk kokoa-kikiok.

Huhule-haladoi makasi

² Au ahani Manetualain tutulu-fafalin no ta haelai amanasa fa; boema Ana taoafik neu au, ma namanene au dokodoeng-nga.

³ Ana hela-na au neme bolok soe-a dalek ma neme tane manai puuk dale-a mai. Ana nangatutuuk au neu, pupuku batu lain, nalosa au ei ngganggani-nga matetuk.

⁴ Ana nanoli au, nakamee-nakamee beuk, nakamee kokoa-kikiok, soaneu ita Manetualain-na. Hataholi makadotok litan, de ala bii-lamata'u, boema lamahele neu Manetualain.

⁵ Maua-manalek ba'eneu hataholi fo, namahele neu Manetualain, fo ana ta tunga sene-do'ok neu lamatua daebafak-kala, do noke tutulu-fafalik neme hataholi manakaoa-ndaeaok-ka mai fa.

⁶ Manetualain, O tatao-nono'in makadotok nanseli ba'eneu ami, ou au Manetualain, ta hapu hata fo, hapu nakasasamak-kana no O fa! O dale tutu'um makadotok, tao-na ami dodoo doak-kana, ta hapu tui la'iesak-kasa fa.

⁷ O ta hii tunu-hotuk, ma tutunu-hohotu nana'ak fa, o ta moke tutunu-hohotu nanatunuk ma tutunu-hohotuk fo, sala-singok nanafe do'o do ampon fa. Tehu O fe basa au di'idook fo au hapu amanene O halam-ma.

⁸ Boema au afa'da ae, “Au nde ia, nai susula nanalunuk fo nanasulak la'eneu au.

⁹ Au amahoko tao-no'i O hihii-nanaum, ou Manetualain, au pe'da O hoholo-lalanem nai au daleng dale.”

¹⁰ Nai O anam-mala makaluku-makatelen-na dalek, au tui-benga hala malole-a ae O soi-tefam-mala ami so. Au ta hahae, tui-benga dede'ak ndia fa, O bubuluk basa sila-la, ou Manetualain.

¹¹ Au ta pe'da hala so'da-molek ndia, nai au daleng dale fa, Au tui-benga O tutulu-fafalim, ma O lilinekam tataas esa. Au ta denge-denge nai O anam-mala makaluku-makatelen-na dalek fa, tehu au po'a-benga O susue-lalaim ma O lilinekam.

¹² Manetualain, boso hahae sue-lai au; masulu-mahapa au tataas esa, nenik O susue-lalaim ma O lilinekam.

Huhule-haladoi dokodoek-ka

¹³ Susa-soe makadotok, lakahapi-la au, ta hapu leke-nala dede'un-na fa. Au sala-singong-ngala usi au, losa au ta hapu ita fa. Dede'un-nala lena heni langadook manai au langang lain-na, ala tao laketu au namahehenang-nga.

¹⁴ Ou Manetualain, soi-tefa-mala au, Manetualain, mai lai-lai, fo tulu-fali au!

¹⁵ Nemen-na fo, hataholi fo nahiik taonisa au-a ana kala boema nalai napangamak. Nemen-na fo, hataholi manaeki au doi-dosong-nga, ana kala ma nananakamumulu-nakamamaek.

¹⁶ Nemen-na fo, hataholi manahika au-a, ana nggenge ma ana mae.

¹⁷ Ela leo been-na, hataholi manasene-do'ok neu O-a, lamahoko ma setelee, ma hataholi manasue-lai so'da-molek neme O mai-a, lafa'da lakandoo lae, “Tete'ek-ka, Manetualain matua-madema!”

¹⁸ Au ia, hataholi nuu ta-hata tak, ma tapandoes, tehu Manetualain taoafik neu au. O nde, au manatulu-falaing, ma manasoi-manatefang, fo makano'dok fain-na, ou au Manetualaing!