MAZMUR 39 - Susula Malalaok Hehelu Palak Ma Hehelu Beuk

Hataholi manadoi-dosok-ka manakun-na

¹ Soaneu mauli-malanga nakameek-ka. Dauk kokoa-kikiok. Soaneu Yedutun.

² Au dodo ae, “Au nau anea au aoinang-nga, fo ela au ta asala-asingo inik, au maang-nga fa. Au ta nau kokolak nai lelek, hataholi mangalauk-ka bei deka no au.”

³ Au denge-denge akandondoo henin, nalosa au akatutu'dak seluk, au aoinang-nga, Ma au ame'da, au doi-dosong boetai namabelak-ka;

⁴ Hela-hae matuaina, tuni-nala au. Boetai dudu'a-dodoon soona, au daleng-nga boetai he'dis-sa; mate'en-na au afa'da ae,

⁵ “Manetualain, mafa'da mae, faihi'da au fai mamateng-nga losa, fo ela au bubuluk, au so'dang-nga, keke'uanak nanseli.”

⁶ O maketu au teung-nga, keke'uanak nanseli! Ba'eneu O soona, au so'dang-nga sosoa-ndandaan ta. Tete'ek-ka, hataholi daebafak-ka sama leo ka'da ani hahaek-ka,

⁷ so'dan-na sapu-lalo sama leo salaok-ka. Ana nakalupu ka'da hata fo, sosoa-ndandaan ta; ana nakaduduluk hata-heto, tehu ana ta bubuluk see kande pake-nggao-nana fa.

⁸ Besak ia, au ahani beek bai ou Manetualain? Au namahehenang-nga, nde ka'da O mesam-ma.

⁹ Po'i au neme basa au sala-singong-ngala mai, boso po'ilotak hataholi nggoak-ka, hakinonoli au.

¹⁰ Au denge-denge, de au ta huka au bafang-nga fa, nana O nde fepa-li'u au.

¹¹ Ho'i-ma O huhukum-ma neme au mai, nana au hihii mate, nanahu O fefepam-ma.

¹² O fepa-li'u hataholi esa nenik huhukuk nanahu salan-na, ma O tao makalulutuk lole-napun sama-na leo andae-a; Tete'ek-ka, hataholi daebafak-ka sama leo ka'da ani hahaek-ka.

¹³ Mamanene au huhule-haladoing, ou Manetualain, taoafik neu au dokodoeng-nga; boso denge-denge, metema au kii. Sama leo basa au bei-ba'i kaing-ngala, au leo o O ka'da ba'ihanak mesan.

¹⁴ Boso tao au, fo ela au amahoko faa, bei dai au beita la'o, fo au tang-nga so.