MAZMUR 37 - Susula Malalaok Hehelu Palak Ma Hehelu Beuk

Hataholi mangalauk ma hataholi malole-a ua-nalen

¹ Neme Dauk mai. O dalem-ma boso falahaa, nanahu hataholi mangalauk-ka, boso mape'da dalek neu hataholi fo, manatao salak-ka.

² Nana mopos no lai-laik, sama leo na'u-a, ma ala male-tale, sama leo bubu'u-palusa momo'dok-ka.

³ Mamahele neu Manetualain, ma tao-no'i hata fo malole-a, leo nai nusak ndia, ma makaboboi o aoinam-ma, no lilinekak.

⁴ Sanga o tetu-temam nai Manetualain, neukose Ana tao natetu o dale hihiim-ma.

⁵ Fe o so'dam-ma neu Manetualain, mamahena neun, te neukose Ana tulu-fali o.

⁶ Neukose, Ana nafa'da o lilinekam sama leo mangale'dok-ka, ma o dale ndoom-ma, sama leo fai lele'don-na.

⁷ Mahani Manetualain no dalek fo manatesa-tamak-ka, mahani no, boso haelai mamanasa, losa Ana tao hata esa. O dalem-ma boso ba'ihana, soaneu hataholi fo ana hapu dai nai so'dan-na dalek, do hataholi manake'di-ndiuk-ka.

⁸ Boso mamanasa, do dalem-ma namahana, te ndia ka'da neni soe.

⁹ Nana hataholi manatao, tatao-nono'i mangalauk-ka, neukose mopok-kana, tehu hataholi fo, namahena neu Manetualain-na, neukose nanuu dae ndia.

¹⁰ Hataholi mangalauk-ka, neukose mopok-kana no lai-laik metema sangan soona, ta kana so.

¹¹ Hataholi fo, manamakaloe-makadae aok, neukose nanuu dae ndia, fo ana hapu tetu-temak fo manasasi kao-kaok-ka.

¹² Hataholi mangalauk-ka, ana tutu'u hata mangalauk soaneu hataholi malole-a, ma ana meten no nakamuu-nakadauk

¹³ Tehu Manetualain hika hataholi mangalauk-ka, nana Ana bubuluk hataholi ndia, fai mate'en-na, ana deka so.

¹⁴ Hataholi mangalauk-ka, ana fe'a tafainan-na, ma ana kou kou-kou isin-na, fo ana taonisa hataholi nuu ta-hata tak-ka, ma manadoi-dosok-ka, fo ana do'do-pau hataholi fo, so'dan-na malole.

¹⁵ Tehu hataholi mangalauk-ka, neukose tafainan-na, pau seluk-kana, sila kou-koun-na, neukose nanatao nala'dik.

¹⁶ Hataholi malole fo, bua-lo'an faa anak, tehu belin-na lena heni hataholi mangalauk-ka hahapu makadoton-na.

¹⁷ Nana neukose, Manetualain helu la'di hataholi mangalauk-ka, koasan-na, tehu nasulu-nahapa hataholi malole-a.

¹⁸ Manetualain nanea, hataholi manatao malole-a, so'dan-na, sila pusakan-na, nahele losa dodoon-na.

¹⁹ Nai lelek lai to'a-taak-ka dalek, neukose ala ta doi-doso fa, nai tepo-lelek la'a-ndoes-sa, neukose ala lamasu'i-lakabete.

²⁰ Tehu hataholi mangalauk-ka, neukose mopo-maten, neukose mopo Manetualain musun-na, sama leo bunga nai mook-ka, neukose mopok-kasa, lai ha'i masuk dale.

²¹ Hataholi mangalauk-ka, ana tona, tehu ana ta nggati falik-kana fa, tehu hataholi malole-a, ana fe no dale katema tuak.

²² Hataholi fo, Manetualain ba'e-palan, neukose nanuu dae ndia, tehu hataholi nanasoo-supak-ka, neukose nanausi henik.

²³ Manetualain hela-nole hataholi nai enok fo, ana la'ok tungak-ka, Ana tao natea-nahele hataholi fo, so'dan-na nandaa no dalen-na.

²⁴ Metema-ana tu'da soona, neukose ta nakahina belak fa, nana Manetualain ho'u nahele liman-na.

²⁵ Neme au muli-solung-nga losa au amalasi so, au beita ita Manetualain la'oela hataholi malole-a fa, do upu-anan da'di hataholi manaloke su'di beek-ka.

²⁶ Ana fe hataholi tona tataas esa, ma ana fe, de anan-nala da'di baba'e-papalak ba'eneun.

²⁷ La'oela hata fo mangalauk-ka, ma tao hata fo malole-a, soona o tititi-nonosim leo napalasa dae ndia losa dodoon-na.

²⁸ Nana Manetualain sue-lai tatao-nono'ik fo malole, ma ndoos ma matetuk-ka, hataholi fo, ana lilineka neun-na, Ana ta po'ilotak-kana doi-doso fa. Ana nasulu-nahapas losa dodoon-na, tehu hataholi mangalauk-ka tititi-nonosin, neukose nanatao namopo-namatek.

²⁹ Hataholi manatao malole-a, neukose nanuu dae ndia, fo ana leon losa dodoon-na.

³⁰ Hataholi malole-a, hala-kokolan manatee-tenok, ana kokolak ndoos tataas esa, nai hala-kokolan-na dalek.

³¹ Ana pe'da ndia Manetualain-na hoholo-lalanen nai dalen dale, de ana tao natetu la'iesak-kasa.

³² Hataholi mangalauk-ka, ana maku hataholi malole-a, fo ana sanga fai loak soaneu taonisan.

³³ Tehu Manetualain ta po'ilotak-kana tu'da leo musu-a liman dale neu fa, do nanahukuk, nai lelek dede'an-na nanapalisak.

³⁴ Mamahena neu Manetualain, ma tunga paletan-na, soona Ana so'u o, fo o manuu dae ndia; neukose o mita hataholi mangalauk-ka nanatao namopo-namatek.

³⁵ Au ita hai, hataholi mangalauk esa, ana hii kokolak bafa louk; ndia sama leo ai fo doon-na momo'dok, ma okan-na tola demak-ka.

³⁶ Lelek au tunga ndia, te tak-kana so, au sangan tehu au ta hapu fa.

³⁷ Taoafik neu hataholi malole-a ma hataholi dale ndoos-sa; hataholi fo nahiik mole-dame-a, so'dan nai fai manamaik-ka, malole.

³⁸ Tehu hataholi masala-masingok-ka, neukose nanatao namopo-namatek; neukose tititi-nonosin nanatao namopo-namatek.

³⁹ Manetualain soi-tefa hataholi manatao malole-a, ma nasulu-nahapas nai lelek fai to'a-taak-ka.

⁴⁰ Ana tulu-fali, ma Ana soi-tefas, ma Ana fes lala hataholi mangalauk-kala deak, nana, ala lasulu-lahapa leu Manetualain.