MAZMUR 36 - Susula Malalaok Hehelu Palak Ma Hehelu Beuk

Hataholi daebafak-ka tatao-nono'i mangalaun-na ma Manetualain dale malolen-na

¹ Soaneu mauli-malanga nakameek-ka. Neme Dauk, fo Manetualain atan-na.

Hataholi daebafak-ka, tatao-nono'i mangalaun-na

² Sala-singok-ka, ana kokolak nai hataholi mangauk-ka dalen dale nae, ana tabii-amata'u neu Manetualain makandondook fa.

³ Ana nafa'da nae ndia aoinan-na anseli nanseli, nalosa tanamedan-na salan-na, de ana ta hahae tao salak fa

⁴ Dede'a-kokolan mangalauk-ka, ma henuk no tipu-daik-ka, ana ta tao dede'a malole, ma manatee-tenok so'on.

⁵ Ana tutu'u eno mangalauk, nai pepe'un lain; ta hapu tatao-nono'i malole, nai tatao-nono'in dale fa, ma ana ta tipa mangalauk-ka fa.

Manetualain dale malolen-na

⁶ Manetualain, O susue-lalaim, dema lalai-a, ma O lilinekam, losa ko'as-sa.

⁷ O dale malolem-ma, namadema dema letek-ka ma O ndoo-matetum-ma dema tasi maloaina; Ou Manetualain, O makaboboi hataholi daebafak-ka, ma bana-manu.

⁸ Ou Manetualain, O susue-lalaim ba'un-na seli, hataholi daebafak-ka nasulu-nahapa nai O li'da susuem-ma dalek.

⁹ Ala la'a lakabete nana'ak fo, manasasi kao-kaok-ka, nai O Umam, O fes linu neme O leem fo, oen-na neni ao mapenak.

¹⁰ O nde oemata maso'dak ba'eneu basa mahahaek-kala, nai O mangale'dom-ma dalek, ami mita mangale'dok-ka.

¹¹ Ela leo been-na, O sue-lai mahele, hataholi fo lalelak O, ma tao malole neu hataholi fo, dale ndoos-sa.

¹² Boso po'ilotak hataholi manakoao-ndaeaok-ka, sapu-na au do hataholi mangalauk-ka usi au.

¹³ Mete leona, te hataholi fo manatao tatao-nono'i mangalauk-ka, ana tu'u neu so, ala bala leu dae, de ala ta hapu fo'a so'on.