MAZMUR 34 - Susula Malalaok Hehelu Palak Ma Hehelu Beuk

Kokoa-kikiok ba'eneu Manetualain dale malolen-na

¹ Dauk kokoa-kikiok, nai lelek ana tao aoinan-na, nono'kabai hataholi kamulus-sa nai Abimelekh matan, nalosa nanausik boema ana la'o.

² Au sanga oke makasi neu Manetualain su'di faik, ma au ta hahae koa-kio fan.

³ Au sanga tao amatutua au daleng-nga, nanahu Manetualain tatao-nono'in; ela leo been-na, hataholi nanatuni-ndenik-ka namanenen fo namahoko-setelee.

⁴ Mamatutua-mamadedema Manetualain sama-sama mo au leona, mai fo ata sama-sama koa-kio na'den-na.

⁵ Au hule-haladoi neu Manetualain de Ana nataa, boema Ana soi-po'i au neme bibii-namata'uk lala'ena mai.

⁶ Hataholi nanatuni-ndenik-ka, namahena neun, de Ana namahoko-setelee, ala ta lanuu ne'ek soaneu ala bii-mae fa.

⁷ Hataholi ua-nale ta malole-a, naloo bou-bou, de Manetualain nataan, Ana soi-po'in neme makase'en lala'ena mai.

⁸ Manetualain ata nusa so'dan-na, nanea hataholi fo kamahehelek-ka, ma Ana soi-po'is leme soe-a mai.

⁹ Mame'da aom, Manetualain dale malolen-na, ba'un-na seli, Maua-manalek ba'eneu hataholi fo, nasulu-nahapa neun.

¹⁰ Fe ha'da-holomata neu Manetualain, hai emi fo, anan-nala lemin, nana hataholi kamahehelek-ka, neukose ana ta to'a-taa fa.

¹¹ Singa-la boeo lamala'a, nanahu nana'ak-ka ta dai fa; tehu hataholi fo, manasene-do'ok neu Manetualain-na, ana ta to'a-taa fa.

¹² Mamanene leon, hai ni'iana-la lemin, au anoli emi, fo fe ha'da-holomata neu Manetualain.

¹³ Emi nau, emi teum-ma namanalu fo mame'da mita, hata fo malole-a do?

¹⁴ Boso kokolak dede'a-kokolak mangalauk, ma boso nau ke'di-ndiuk-ka.

¹⁵ Madook aoinam-ma, neme mangalauk-ka mai, ma tao-no'i hata fo malole-a, sanga enok soaneu mole-dame-a, nenik basa o be'i-balakaim lala'ena.

¹⁶ Manetualain taoafik neu, hataholi manatao ndoos-sa, Ana namanene, metema ala nggasi fo loke tutulu-fafalik.

¹⁷ Tehu hataholi manatao tatao-nono'i mangalauk-ka, Ana la'ban-nana; metema mates soona, no lai-laik, lafandele henis.

¹⁸ Metema hataholi manatao ndoos-sa, naloo bou-bou soona, Manetualain namanenen, ma Ana soi-tefa-nas, neme toto'a-tataak lala'ena mai.

¹⁹ Manetualain deka no, hataholi dale manaba'ihanak-ka; Ana soi-tefa-na hataholi fo, ketu namahehenan-na.

²⁰ Hataholi malole-a, doi-doson makadotok, tehu Manetualain soi-po'in neme basa sila-la mai.

²¹ Manetualain nanea nahele aopaan-na, ta la'di duin esa boen.

²² Hataholi manatao tatao-nono'i mangalauk-ka, neukose maten nanahu tatao-nono'i mangalaun-na, Hataholi fo, nape'da dale nasak hataholi manatao dede'a malole-a, neukose nanahukuk.

²³ Manetualain soi-tefa-nala atan-nala; fo manamasulu-mahapan neun-na, neukose ta nanahukuk fa.