MAZMUR 33 - Susula Malalaok Hehelu Palak Ma Hehelu Beuk

Nakamee kokoa-kikiok

¹ Hai hataholi kamahehelek-kala lemin, eki ma matadale leona, nanahu hata fo Manetualain tao-no'in; ela leo been-na, hataholi dale ndoos-sa koa-kio,

² Moke makasi neu Manetualain nenik kacapi, makamee ba'eneun, nenik sasanu liik.

³ Makamee nakamee beuk, ba'eneu Manetualain, makaminak kacapi matalolole, ma eki no namahokok!

⁴ Basa Manetualain dede'a-kokolan hapu nananamahelek; Ana lilineka nai basa tatao-nono'in-na dalek.

⁵ Ana sue-lai ndoos ma matetuk-ka; basa daebafak-ka lala'ena, henuk no susue-lalain.

⁶ Manetualain fe paleta, boema lalai-a da'di; nakadada'dik le'do-a, bulak-ka ma nduuk-kala neme hala-kokolan mai.

⁷ Ana tao nakabubua tasi oe-a, neu mamanak esa, nakataka nahele tasi maloaina nai te'te dale.

⁸ Nemen-na fo, basa daebafak-ka lala'ena bii-namata'u neu Manetualain ma laun manai daebafak-ka fe ha'da-holomata neun.

⁹ Nana Ana kokolak, boema basa-basan nananakadada'dik; Ana fe paleta, boema basa-basan da'di.

¹⁰ Manetualain tao-na leoina-kala dale tutu'un-nala, ta da'di fa, Ana tao namopo, dale tutu'un-nala.

¹¹ Tehu Manetualain dale tutu'un-na nakatatakak nahele, dale tutu'un-na, matea-mahelek losa dodo-na.

¹² Maua-manalek ba'eneu leoina fo, ana manaku Manetualain da'di leo ndia Manetualain-na, maua-manalek ba'eneu hataholi fo Ana helen da'di Ndia nuun!

¹³ Manetualain mete leo dae mai, neme nusa so'dak-ka mai, de Ana nita basa hataholi daebafak-ka lala'ena.

¹⁴ Manetualain mete besa-besa basa hata fo manaleo nai daebafak-ka neme kandela manen lain mai.

¹⁵ Ndia nde nakadada'dik sila dalen-na, de Ana bubuluk basa, sila tatao-nono'in lala'ena.

¹⁶ Manek-ka ta sengi, hu kande solda'du makadoton-nala fa, solda'du ta naso'da, hu kande be'i-balakain fa.

¹⁷ Ndala nde been-na, namahehena manada'di tak soaneu ana sengi, be'i-balakai matuaina, ta hapu neni maso'dak fa.

¹⁸ Manetualain nanea, hataholi kamahehelek-kala, fo lamahena neu susue-lalain-na.

¹⁹ Ana soi-tefa-nalas, leme mamates-sa mai, ma Ana fes laso'da, nai tepo lelek la'a-ndoes-sa.

²⁰ Boema ita tamahena neu Manetualain, Ndia nde ita manatulu-falin, ma manamasala'en-na.

²¹ Ita tamahoko, nanahu Ndia ma tamahele neu na'den fo, malalao-malalafun-na.

²² Ou Manetualain, ela leo been-na, O sue-lai mahele ami, nana ami mamahena neu O.