MAZMUR 30 - Susula Malalaok Hehelu Palak Ma Hehelu Beuk

Huhule-haladoi makasi

¹ Dauk kokoa-kikion-na. Nakameek soaneu nakatema Manetualain Uman-na.

² Au koa-kio O, ou Manetualain, nana O soi-tefa basa au so ma O ta po'ilotak au musung-nga eeki-natadale au fa.

³ Ou Manetualain, fo au Manetualaing-nga, au aloo bou-bou neu O, au oke tutulu-fafalik, ma O tao malea-mahai au.

⁴ O matapo'i au neme mamates-sa mai, ma O tao maso'da au neme hataholi manamatek-kala tala'da mai.

⁵ Makamee nakamee kokoa-kikiok ba'eneu Manetualain, hai Manetualain anan fo manalilinekak-kala lemin, ma moke makasi neu Ndia Fo Malalao-malalafuk nanseli.

⁶ Nana ela ka'da ba'ihanak seluk faa bai te Manetualain namanasa, dale malolen-na nakandoo losa dodoon-na Nai fai le'odaen-na au kii, tehu fafaianan-na neni namahoko-seteleek.

⁷ Lelek au ame'da au daleng-nga tesa-tama, au afa'da ae, “Neukose au ta anggengo duku dodon-na!”

⁸ Nana O dalem-ma malole neu au, ou Manetualain, O makadada'dik au sama leo lete matea-mahelek. Tehu basa boema, O mafuni meme au mai, de au da'di bii-amata'u.

⁹ Ou Manetualain, au aloo bou-bou, neu O, fo au dokodoe ae,

¹⁰ “Sosoa-na beek ba'eneu O, metema au mate, ma kona leo bolo mamates dalek neu? Ade hataholi manamatek-ka, koa-kio O ma tui-benga O lilinekam do?

¹¹ Mamanene leon, ou Manetualain, fo sue-lai au. Manetualain, tulu-fali au leona!”

¹² O tao nggati au kii-makaleleung nenik fofoti-lolongek. O ho'i-ma au dale he'ding-nga, ma O tao mahenu au daleng-nga, nenik namahokok.

¹³ Hu ndia de, au ta nau denge-denge fa; Ou au Manetualain, au akamee, nakamee kokoa-kikiok ba'eneu O, ma au oke makasi neu O, losa dodoon-na!