MAZMUR 29 - Susula Malalaok Hehelu Palak Ma Hehelu Beuk

Manetualain halan-na nai ani-sangu dale

¹ Dauk kokoa-kikion-na. Koa-kio Manetualain leona, hai mahahaek nusa so'dak-kala lemin, koa-kio matua-mademan ma koasan-na.

² Koa-kio Manetualain na'de mandela-masa'an, sene-do'ok-kana nenik pake papake-ngganggao masene-do'ok.

³ Manetualain fo matua-madema, nanggulu nai tasi lain, halan-na nadodolo nai tasi maloaina lain.

⁴ Manetualain halan-na nananamanenek, henuk no koasa ma kokoa-kikiok.

⁵ Manetualain halan-na hea nabuu ai huuk-kala, ana helu la'di ai kaiou Libanon-nala

⁶ Ana tao-na letek Libanon-na nakaboku sama leo sapi ana, Letek Siryon-na nakaboku sama leo banteng ana.

⁷ Manetualain halan-na tao-na ndelas-sa tu'ti-natok-ka.

⁸ Manetualain halan-na tao nanggengo moo solokaek-ka, Manetualain tao nanggengo moo solokaek Kades-sa.

⁹ Manetualain halan-na taon-na nusa ina kailus-sa ana bongi tutik, boema Ana taon-na nula da'di loak; ma nai Manetualain Uman-na dalek basa hataholi-la laloo bou-bou lae, “Manetualain fo mandela-masa'ak!”

¹⁰ Manetualain koasa neu faa tuak-ka Ana koasa da'di leo Manek, losa dodoon-na.

¹¹ Sa'di leo been-na, Manetualain fe anan-nala be'i-balakaik, ma Ana tao-nalas tetu-temak.