MAZMUR 28 - Susula Malalaok Hehelu Palak Ma Hehelu Beuk

Huhule-haladoi dokodoe tutulu-fafalik

¹ Dauk kokoa-kikion-na. Ou Manetualain, au aloo bou-bou neu O, au manamasala'eng-nga nde O, mamanene au hala naloloong-nga. Metema O denge-denge soaneu au soona, au sama leo hataholi fo ana kona leo bolo mamates dale neu.

² Mamanene au dokodoeng-nga, metema au nggasi, fo au oke tutulu-fafalik, ma au so'uk au limang-nga, fo natu'du leo O Uma malalao-malalafum-ma neu.

³ Boso tao mamopo-mamate au sama-sama no hataholi malelesik-ka, sama-sama no hataholi manatao tatao-nono'i mangalauk-ka. Metema ala kokolak no hala mangana'uk, tehu dalen-nala soona henuk no kaboo-kabalik

⁴ Hukus, nanahu sila tatao-nono'in, nanahu tatao-nono'i mangalauk fo ala tao-no'ik-ka. Hukus nandaa no sila tatao-nono'in; fes huhukuk nandaa no tatao-nono'in-nala.

⁵ Ala ta taoafik neu Manetualain tatao-nono'in fa, do hata fo Ana tao-no'ik-ka. Hu ndia de, neukose Ana hukus, ma Ana tao namopo-namates losa dodoon-na.

⁶ Kokoa-kikiok ba'eneu Manetualain, nana ana namanene au dokodoeng-nga so.

⁷ Manetualain nde been-na, au masulu-mahapang ma manamasala'eng-nga, de au amahele neun. Ana tulu-fali ma Ana tao namahoko au daleng-nga, au koa-kion nenik nakamee makasi.

⁸ Manetualain fe be'i-balakaik neu anan-nala, Ana nasala'e ma soi-tefa manek fo Ana helek-ka.

⁹ Soi-tefa-ma O anam-mala, ou Manetualain, ba'e-pala O hataholim-mala. Da'di sama leo manfoo esa ba'eneus, ma maneas losa dodoon-na.