MAZMUR 22 - Susula Malalaok Hehelu Palak Ma Hehelu Beuk

Huhule-haladoik nai lelek susa-soe-a, ma nakamee kokoa-kikiok

¹ Soaneu mauli-malanga nakameek-ka. Tunga nakameek: Nusa nai fai dulufulan-na. Dauk kokoa-kikion-na.

² Au Manetualaing, ou au Manetualaing, tao le'e de O la'oela au? Au aloo bou-bou, tehu O mahele nai dook-ka, de O ta tulu-fali au fa.

³ Ou au Manetualaing, au aloo bou-bou nai fai lele'don-na, tehu O denge-denge mahele. Au hule-haladoi nai fai le'odaen-na, tehu au daleng-nga ta tesa-tama fa.

⁴ Tehu O Manek Fo Malalao-malalafuk nanseli, fo Israel koa-kion.

⁵ Ami bei-ba'i kaim-mala, lamahena neu O, lamahena de O soi-tefa-malas.

⁶ Laloo bou-bou neu O, de O fes laladeak; lamahena, de dalen-nala tesa-tama.

⁷ Tehu au ia kalati dae, te ta hataholi daebafak fa, hataholi makadotok hakinonoli ma lakadadaek au.

⁸ Basa hataholi manalita au-a, ala hakinonoli au, ala kolopii difadoon-nala, ma lakakale langa.

⁹ Lafa'da lae, “Nemen-na fo nasalai dean-na neu Manetualain, fo ela Manetualain soi-tefa nan, metema Manetualain dalen-na neulauk non!”

¹⁰ O nde fe au kalua eme au inang tein dale mai, ma O taom-ma au nee-nee lino-lino nai au inang ifan lain.

¹¹ Neme bongi au mai-a, au ua-naleng nai O limam dale, nai lelek au nai au inang tein dale, O nde au Manetualaing-nga.

¹² Boso dook-ka meme au mai, nana soe-a deka so, ma ta hapu manatulu-fali fa.

¹³ Musu-a nakamomotu-na au, sama leo sapi mane bubuak esa, lakahapi-la au, sama leo sapi mane fuik-ka neme Basan mai.

¹⁴ Lasasale matak loo au no bafan-nala beepoo, sama leo singa nanggao fo ana kaa.

¹⁵ Au be'i-balakaing basan, sama leo po'a heni oe-a, basa au duing-ngala latasesu leme sesesun-nala mai, au daleng-nga noe, sama leo lilik-ka.

¹⁶ Au botolii koko'dong-nga namatuu sama leo fale fangik-ka, au maang-nga nakadita-na, au tanalaing-nga. Manetualain, O la'oela au nai daesopuk lain, sama leo hataholi manamate basak-ka so.

¹⁷ Hataholi mangalauk bubuak esa, lakahapi-la au; sama leo busa bubuak esa, lakamomotu-la au, ala papau au limang-nga ma au eing-nga.

¹⁸ Basa au duing-ngala hapu au leke as, musu-a mete au, sama leo natutu'duk esa.

¹⁹ Ala baba'e au bua papakeng-nga, ma ala tu'u batu soaneu au ba'du manalung-nga.

²⁰ Tehu O, boso dook-ka meme au mai, ou Manetualain, mai lai-lai fo tulu-fali au, nana O nde au be'i-balakaing.

²¹ Soi-po'i au samaneng-nga neme tafaina mai, soi-tefa-mala au neme busa makaak-ka mai.

²² Au ndole-ndaku, de soi-po'i au neme sapi fuik-ka susulan-na, ma neme singa bafan-na mai.

²³ Neukose au tui O tatao-nono'im neu au tolanoong-ngala; nai O anam-mala nakabubuan-na dalek, au koa-kio O.

²⁴ Koa-kion leon, hai hataholi kamahehelek-kala lemin! Mamatutua-mamademan leon, hai Jakob tititi-nonosin-nala lemin! Sene-do'ok neun leon, hai basa Israel tititi-nonosin-nala lemin!

²⁵ Nana Ana ta mete nakadadaek hataholi nanatuni-ndenik-ka fa, ma Ana ta taoafik neu doi-doson-na fa. Ana ta lepos nasadea hataholi ndia fa, tehu namanene, metema noke tutulu-fafalik neun.

²⁶ Nai O anam-mala nakabubuan-na tala'da, au koa-kio O, nana basa hata lala'en fo O tao-no'in so. Nai hataholi kamahehelek-kala matan, au tunu-hotu tutunu-hohotuk fo au heluk-ka.

²⁷ Neukose hataholi nuu-taa hata-taak-ka, na'a losa nakabete; hataholi fo ana mai leo Manetualain mai, neukose ana koa-kion. Sa'di leo been-na, emi tetu-temak losa dodoon-na!

²⁸ Neukose basa leoina-la lafandele neu Manetualain fo ala fali ma'is, basa leo ma leoina lala'ena, neukose ala sene-do'ok-kana.

²⁹ Nana Manetualain nde manakoasa, Ana paleta leoina-la.

³⁰ Basa hataholi matua-la, neukose ala sene-do'ok lai matan-na, basa hataholi daebafak fo, manasapu-manalalok-kala, neukose ala sene-do'ok-kana.

³¹ Bobongi manamaik-kala, neukose lakaluku-lakatele ma fe ha'da-holomata neu Manetualain, Neukose nanatui-bengak neme tititi-nonosik leo tititi-nonosik neu.

³² Soaneu leoina makabuik-kala, neukose nanatui-bengak, lae Manetualain soi-tefa-na anan-nala so.