MAZMUR 2 - Susula Malalaok Hehelu Palak Ma Hehelu Beuk

Manek fo Manetualain helek-ka

¹ Tao le''e de, leoina-la tao tasi'bu ma leo-leo-la, tutu'u hata manada'di tak-ka?

² Mane daebafak-kala, fo'a landaa ma basa manakoasa-la, lakabubua fo lalahalak la'ban Manetualain no Ana hele manek-ka.

³ Manakoasa sila-la lafa'da lae, “Mai fo ata helu la'di sila koasan-na, fo ata loso-ta falik ita ao loan-na!”

⁴ Manetualain hika neme kandela manen manai nusa so'dan-na mai, ma Ana hakinonoli sila dale tutu'un-na.

⁵ Boema nasapalas no nasak ma Ana tao nanggengek-kasa nenik nasa-melun

⁶ nae, “Nai Sion, fo Au pupuku malalao-malalafung-nga, Au ndo ei basa manek fo Au helek-ka.”

⁷ Manek-ka nae, “Au sanga po'a-benga, hata fo Manetualain naketu basan so. Nafa'da au nae, ‘Au ana maneng O, de faik ia, Au da'di O Amam.

⁸ Moke leona, soona Au fe o, basa leoina lala'en-na, ma Au tao daebafak-ka lala'en-na, da'di o nuum.

⁹ Neukose o helu la'dis nenik aitete'e besi ma o tao ba'en, sama leo uledae-a.’ ”

¹⁰ Da'di, taoafik leona, hai mane-manek-kala lemin, bubuluk leona, hai manakoasa daebafak-kala lemin!

¹¹ Makaluku-makatele neu Manetualain no namahehelek,

¹² sene-do'ok nai matan-na, no dele ngge'be-ngge'be, boso nalosak Manetualain da'di namanasa fo emi nanatao namopo-namatek ka'da nai hatematak esa, nana nasa-melun, ana pila no kaiboik. Maua-manalek ba'eneu hataholi fo nasulu-nahapa neu Manetualain!