MAZMUR 19 - Susula Malalaok Hehelu Palak Ma Hehelu Beuk

Manetualain matua-mademan nai lima tataan-na dalek ma nai hoholo-lalanen-na dalek

¹ Soaneu mauli-malangan nakameek-ka. Dauk kokoa-kikiok.

Manetualain matua-mademan nai lima tataan-na dalek

² Lalai-a nafa'da Manetualain matua-mademan, ma lalai maloa, tui-benga tatao-nono'in.

³ Faik ka esan-na, nanduku-nalosak-kana neu fai manamaik-ka; le'odaek ka esan-na nanduku-nalosak-kana neu le'odaek manamaik-ka

⁴ Ta hapu manamahalak do manakokolak fa, ta hapu halak fo nananamanenek fa.

⁵ Tehu hala naloloon-na, nadodolo nai basa daebafak-ka lala'ena, hala heheluk ndia, losa daebafak-ka bu'un-nala. Manetualain tao uma nai lalai ba'eneu le'do-a,

⁶ fafaianan-na, ana tii mai, sama leo manaka'bing touk-ka, ana kalua neme Kaman dale mai, sama leo palani tatibatu-a namahoko, nai lelek ana mulai la'ok leleo-lala'on.

⁷ Ana la'ok ndolo lalai-a, neme pe'dak leo pe'dak neu; basa hata lala'ena, ala hapu le'do haan-na.

Manetualain hoholo-lalanen

⁸ Manetualain hoholo-lalanen ndia matetu-mandaak, ana tao makasufu samanek-ka. Manetualain paletan-na, hapu nananamahelek, ana fe hataholi fo dudu'a-aafin bei ta namadai fa manatee-tenok.

⁹ Manetualain nakaneneten ndia, nandaa tao namahoko hataholi-a dalen-na. Manetualain nakeketun ndia, neuisik, ana tao-na hataholi-a nalelak.

¹⁰ Nakatele neu Manetualain ndia, malole, de nakatele losa dodoon-na. Manetualain hoholo-lalanen ndia, la'en ma basa-basan matetu-mandaak.

¹¹ Manetualain hoholo-lalanen, belin-na lena heni lilopilas isik-ka makeen-na lena heni fanioe isik-ka.

¹² Basa sila-la, ala fe nasanene'dak neu O atam-ma: ngga'di matuaina, nanasadiak ba'eneu hataholi fo, manatungan-nana.

¹³ Ta hapu hataholi, nameda aon matofa-matalan-na fa; Manetualain, soi-po'i au neme salak fo nananafunik-ka mai.

¹⁴ Madook au neme sala-singok fo au taon no nameme'dak, boso po'ilotak sala-singok ndia, ana koasa-na au. Soona au da'di hataholi sala tak, ma au atapo'i eme sala matuaina mai.

¹⁵ Ela leo been-na, au hala-kokolang ma au dudu'a-aafing nandaa no O dalem-ma, ou Manetualain, fo au manamasulu-mahapang ma manamasala'eng-nga!