MAZMUR 18 - Susula Malalaok Hehelu Palak Ma Hehelu Beuk

Dauk nakamee sesengin-na

¹ Soaneu mauli-malanga nakameek-ka. Dauk kokoa-kikiok, fo Manetualain atan-na. Nananakameek soaneu Manetualain, nai lelek Dauk nanasoi-po'ik neme Saul, ma neme musun-nala liman mai.

² Au sue-lai O, ou Manetualain, O de been-na au be'i-balakaing!

³ Ou Manetualain, fo au pupuku batung, au kota musung ma au manasoi-manatefang-nga, Au Manetualaing au lete batung, au mamana nasulu-nahapang-nga. Au babaa fanang, ma manamanea au, fo au nee-nee lino-lino tataas esa, au kota musung-nga.

⁴ Au aloo bou-bou ae, Kokoa-kikiok neu Manetualain; boema, natapo'ik au neme au musung-nga mai.

⁵ Tali mamates-sala, fefeo-laa au so, ma faa mamate-momopok-ka, lifu-naa au so,

⁶ Susa soe mamates-sa, okofefeon-na au so, hihi'i mamates-sala, nanalonak nai au matang-nga.

⁷ Lelek au nai toto'a-tataak-ka dalek, au aloo bou-bou neu Manetualain, au aloo neu au Manetualaing-nga, fo au oke tutulu-fafalik. Ana namanene au halang-nga, neme Uman dale mai, ma ana tao afik neu au dokodoeng-nga.

⁸ Boema daebafak-ka nanggengo, ma ana dele, ma letek-kala huun-nala dele, ma laleuk, hu kande Manetualain nasa-melun.

⁹ Ha'imasuk-ka, namasu poka-poka neme pana bolon-na mai, ha'i-a pila nasalolo'de neme bafan na mai, ha'ikaak manapilak-kala kalua neme aon-na mai.

¹⁰ Ana fa'a ba'e lalai-a, boema Ana kona no ko'a makahatuk-ka nai ein-na dae.

¹¹ Ana sa'e mahahae nusa so'da mali'dak-ka kerub de Ana laa; Ma naleu-nalaak nai anin-na li'dan lain.

¹² Ana nalu'e ketu aoinan-na, nenik makahatuk-ka; ko'as masakoko'a makateina, okofefeo nalan.

¹³ Ko'as, u'da eis, ma ha'i-a, ala kalua leme ndelas manai matan-na mai.

¹⁴ Boema Manetualain nanggulu neme lalai-a mai; Fo Mademaina, fe halan-na nananamanenek halan-na.

¹⁵ Ana kou, kou-kou isin-nala de Ana tao tapasasala musu-a; ndelas-sa, nandela tutui-nato, de ana tao-nas nalai.

¹⁶ Tasi buin-na nasafali leo lain mai ma daebafak-ka buin-na natahuka lelek Manetualain nasapala musun-na no nasa-meluk.

¹⁷ Manetualain look liman-na neme lain mai de Ana ho'u-na au, de Ana hela-na au neme oe mademaina dale mai.

¹⁸ Ana soi-tefa-nala au neme musu mabe'i-balakaik-ka mai, ma neme hataholi fo ta lahiik lo au fa, nanahu ba'eneu au soona, sila mabe'i-balakaik nanseli.

¹⁹ Ala sapu-la au, nai lelek susa-soe-a tuni-ndeni-nala au, tehu Manetualain da'di au manatulu-manafaling.

²⁰ Ana soi-po'i au neme soe dale mai ma Ana soi-tefa-nala au nanahu dalen-na nahiik no au.

²¹ Manetualain balas au tatao-nono'ing fo ndoos-sa; Ana ba'e-pala au, nana au salang ta.

²² Au tunga Manetualain paletan-na ma au ta lepos asadea, au Manetualaing-nga fa.

²³ Au taoafik neu basa hoholo-lalanen-na, ma au akalala'ok paletan-nala.

²⁴ Ana bubuluk, nae au ta asala fa, ma au adook au aoinang-nga,, neme salak-ka mai.

²⁵ Boema Manetualain balas au tatao-nono'ing fo ndoos-sa, nana Ana bubuluk, au salang ta.

²⁶ Manetualain, O lilineka neu hataholi fo manalilinekak-ka, ma malole neu hataholi fo malole-a.

²⁷ Ba'eneu hataholi malalao-malalafuk-ka, O matu'du O aoina malalao-malalafum-ma, tehu O musu moo hataholi mangalauk-ka.

²⁸ O soi-tefa-mala hataholi fo dale taidaek-ka, tehu ne'e makatele, hataholi fo manamakaloe-makadaeaok-ka.

²⁹ O de'de mapila au banung-nga; Au Amang Manetualain tao-na au makahatung-nga da'di mangale'dok.

³⁰ O fe au be'i-balakaik soaneu tao akalulutuk musu-a; no au Manetualaing-nga tutulu-fafalin de au hona abuu, sila kota musun-na.

³¹ Manetualain tatao-nono'in, matetu-mandaak Manetualain hehelun-na, hapu nananamahelek. Ana sama leo babaa fanak ba'eneu basa hataholi fo lasulu-lahapa neun-na.

³² Nana ka'da Amak-ka nde Manetualain-na; ita manamasala'en-na, ka'da nde Manetualain.

³³ Ndia nde Manetualain, fo manafe au be'i-balakaik, ma manatao-na au enong-nga, nee-nee lino-linok.

³⁴ Ana tao-na au eing-nga, balakaik sama leo nusa ein-na, ma nanea au so'da-moleng nai letelepak-ka.

³⁵ Ana nanoli au, soaneu natee-natatik-ka nalosa au hapu hela abe'i kokou mateaina-la.

³⁶ Manetualain, O masulu-mahapa ma soi-tefa au, ma tia-to'ba au nenik O koasam-ma; au sengi, nanahu O tataom-ma.

³⁷ O manea au, fo ela au ta da'di hataholi nanafook, ma au bei ta tu'da ita fa.

³⁸ Au usi au musung-ngala, de au sengis ma O ta makadedeak fa, losa mopo-mates.

³⁹ Au bala abuus, losa ala ta hapu fo'a so'on, ala bala leu dae, de male henis lai au ei tata'bu daenga.

⁴⁰ O fe au be'i-balakaik soaneu atee-atati, de au sengi au musung-ngala

⁴¹ O taom-ma, au musung-ngala lalai leme au mai; hataholi fo ala lakamuu-lakadau au-a, au tao amopo-amates.

⁴² Ala nggasi, tehu ta hapu manatulu-fali fa, ala laloo bou-bou neu Manetualain tehu Ana ta nataa fa.

⁴³ Au taoas beelutu, sama leo daesopuk fo manalapuk-ka, ma au sasapus sama leo tane-a nai enok lain.

⁴⁴ O soi-po'i au neme teidalek malelesik-kala mai, ma O tao au da'di manakoasa neu leoina-la; leoina fo au ta alelak-kana fa, ana da'di au atang.

⁴⁵ Hataholi nusa dea-la, lakatele neu au, ma metema lamanene au paletang-nga soona, ala tunga.

⁴⁶ Sila palanin-nala, mopon so; ala dele beengge'be de ala kalua leme sila kota musun-na mai.

⁴⁷ Manetualain naso'da! Kokoa-kikiok ba'eneu au manamasala'eng-nga! Mamatutua-mamadedema Manetualain ndela-sa'an fo au manasoi-manatefang-nga!

⁴⁸ Ana fe au sesengik soaneu au musung-nga; leoina-la ana fes lakaluku-lakatele nai au matang-nga,

⁴⁹ Ana soi-tefa-na au, neme au musung-ngala mai. Manetualain, O fe au sesengik au musung-ngala O masulu-mahapa au, neme hataholi fo ta nanuu ha'da hataholik-ka fa.

⁵⁰ Boema au amatutua-amadedema O nai leoina-la tala'da, ma au akamee nakamee kokoa-kikiok ba'eneu O.

⁵¹ Manetualain fe sesengi matuaina neu manen-nala, Ana sue-lai nahele hataholi fo Ana helek-kala, fo nde Dauk no tititi-nonosin-nala losa dodoon-na.