MAZMUR 16 - Susula Malalaok Hehelu Palak Ma Hehelu Beuk

Huhule-haladoik fo henuk no namahehelek

¹ Dauk kokoa-kikiok. Ou Manetualain, manea au leona, nana au asulu-ahapa neu O.

² Au afa'da ae, “O nde au Manetualaing-nga, au ua-naleng-nga, ta hapu hata esa boen, fo lena heni O fa!”

³ Au fe ha'da-holomata neu hataholi malalao-malalafuk fo, manai nusak ia-la; au dale namahokong-nga nde, au leo nakabubua nos.

⁴ Nemen-na fo, hataholi manasene-do'ok neu lamatua daebafak-kala, dale he'din-nala, boetai tama lakandoo. Au ta nau fe tutunu-hohotuk, neu lamatua daebafak-kala fa, nakalenak, au ta nau seseik na'den-nala fa.

⁵ Manetualain, au anuu-ka, nde ka'da O mesam-ma; O fe au basa hata lala'en fo, au paluuk-ka, au ua-naleng, nai O limam dale.

⁶ O baba'e-babatim, lolen-na seli ba'eneu au, nandaa nanseli, no au daleng-nga!

⁷ Au koa-kio Manetualain fo mana manoli-mafa'da au-a; nai fai le'odaen-na, au dale bobongoanang-nga, nanoli-nafa'da au.

⁸ Au afandele Manetualain tataas esa; Ana nai au boboang-nga, de au ta anggengo fa.

⁹ Hu ndia de, au daleng-nga namahoko-setelee, ma au samaneng-nga eeki-natadale, ma au aopaang-nga, hahaeaon no mole-dame.

¹⁰ Nana, O ta po'ilotak au mate fa; hataholi fo O sue-laik-ka, O ta po'ilotak-kana mate-mopo fa.

¹¹ O matu'du au, enok manaleo maso'dak-ka neu; nai O dalek, au hapu namahoko-seteleek fo, manasasi kao-kaok-ka, ma ua-nalek-ka losa dodoon-na.