MAZMUR 147 - Susula Malalaok Hehelu Palak Ma Hehelu Beuk

Kokoa-kikiok ba'eneu Manetualain Fo Manakoasa

¹ Koa-kio Manetualain leona! Nana malole nanseli koa-kion, ma nandaa soaneu nakamee kokoa-kikiok ba'eneun!

² Neukose, Manetualain tao nabebeu Yerusalem; neukose, no falik hataholi nanatu'u-tapak-kala.

³ Ana tao nalea-nahai hataholi fo, dalen-na he'dis-sa, ma Ana popoti-papalu bisun-nala.

⁴ Ana naketu nduuk manai lalai-la, dede'un-nala, ma Ana foi esa-esak na'den-na.

⁵ Tete'ek-ka, ita Manetualain matua ma anseli, manatee-tenon-na, too-lanen ta.

⁶ Ana hela nafofo'a, hataholi nanatuni-ndenik-ka, tehu Ana bala hataholi mangalauk-ka, neu dae lain.

⁷ Makamee kokoa-kikiok ba'eneu Manetualain, makaminak kacapi ba'eneu ita Manetualain.

⁸ Ndia nde, nakapepela ko'as-sa nail alai; Ana sadia u'dan, ba'eneu daebafak-ka, ma Ana fe na'u-la, moli lai pupukuk-kala.

⁹ Ana fe bana-manu nana'ak, ma neu manupui kaa, anan-nala, fo ala nggasi loke la'a.

¹⁰ Manetualain dale hiin-na, ta nde ndala balakaik-ka fa; boeo tan de palani tatibatu-a fa

¹¹ Manetualain namahoko neu hataholi kamahehelek-ka, neu hataholi fo, namahena nalele neu susue-lalain.

¹² Koa-kio Manetualain leona, hai Yerusalem! Koa-kio o Manetualain leona, hai Sion!

¹³ Nana, Ana tao natea-nahele, o lelesuinam-mala, ma Ana fe o laum-mala, baba'e-papalak.

¹⁴ Ana nanea o nusam-ma, fo ela nee-nee lino-lino nahele, ma Ana fe o makabete minik gandum malole.

¹⁵ Ana fe paleta neu daebafak-ka, ma nakalala'ok hala-kokolan, no lai-laik.

¹⁶ Ana nakona salju-a, sama leo abas-sa, ma Ana nggali dinis fo, natea leo batu-a, sama leo afu-a.

¹⁷ Ana nakona u'da eis-sa sama leo batu lutu-a; ta hapu hataholi, nakatatakak makasufun-a fa.

¹⁸ Boema, no paletan-na, de eis ndia, ana noe; Ana fe anin-na mai, boema oe-a faa.

¹⁹ Ana nanduku-nalosak hala hehelun-na neu anan-nala, nanduku-nalosak nakeketun ma hoholo-lalanen, neu ana hehelen-na.

²⁰ Ana ta tao leondiak neu leoina fe'ek-kala fa, de ala ta lalelak hoholo-lalanen fa. Koa-kio Manetualain leona!