MAZMUR 143 - Susula Malalaok Hehelu Palak Ma Hehelu Beuk

Huhule-haladoik fo dokodoe tutulu-fafalik

¹ Dauk Kokoa-kikiok. Ou Manetualain, mamanene au huhule-haladoing, taoafik neu au dokodoeng-nga. Mataa au hu kande O lilinekam, sipok au huhule-haladoing, hu kande O ndoos ma matetum-ma.

² O atam au ia, de boso maketu-mala'di au, nana hataholi lala'ena, masalak mesa-mesan nai O matam.

³ Au musung-nga, ana usi au, de ana sengi au so, boema, ana tao au leo bui makahatuk dale neu; au da'di sama leo, hataholi manamate dooinak so.

⁴ Mopo au manggateng-nga so, de au daleng-nga, napangamak nanseli.

⁵ Au afandele fai-fai maneuk-kala; ma au dudu'a-dodoo O tatao-nono'im lala'ena, au dodoo-tatai basa O lima tataam-ma.

⁶ Au so'uk au limang-nga, fo au hule-haladoi neu O; au samaneng-nga, nahiik nanseli, natongo no O, sama leo dae tuuk-ka.

⁷ Ou Manetualain, mataa au no lai-laik leona, nana ketu au namahehenang-na so. Boso mafuni meme au mai, fo ela, au boso sama leo hataholi fo, ana kona leo daebafak mamates-sa neu.

⁸ Tunga-tunga fafain-na, fe au nasanene'dak la'eneu O susue-lalaim, nana, au amahena neu ka'da O mesam-ma. Matu'du au enok fo, au muse tungan, nana, au hule-haladoi neu ka'da O mesam-ma.

⁹ Au mai, fo au sanga asulu-ahapa neu O, ou Manetualain, soi-po'i au neme au musung-ngala mai.

¹⁰ Manoli au, fo au akalala'ok O hihii-nanaum, nana au Manetualaing-nga nde O. O dale malole, de neukose, O hela-nole au, leo eno matetuk-ka neu.

¹¹ Ou Manetualain, soi-tefa-mala au nandaa no O hehelum-ma, hu kande O malolem-ma, de soi-po'i au neme makase'ek-ka mai.

¹² Hu kande O susue-lalaim, de tao mamopo-mamate au musung-ngala, tao mamopo-mate basa manatuni-ndeni au-a, nana O atam au ia.