MAZMUR 140 - Susula Malalaok Hehelu Palak Ma Hehelu Beuk

Huhule-haladoik fo dokodoe nasulu-nahapak

¹ Soaneu mauli-malanga nakameek-ka. Mazmur Dauk.

² Ou Manetualain, soi-po'i au neme hataholi mangalauk-ka mai, ma manea au neme hataholi maseti-malakak-ka mai.

³ Ala tutu'u tatao-nono'i mangalauk nai dalen-nala dalek, ma tunga faik, ala sanga ka'da nale'a-napilik.

⁴ Maan-nala sama leo menge malasok-ka, maan-na, ma dede'a-kokolan-nala sama leo menge suluk-ka, lason-na.

⁵ Ou Manetualain, masulu-mahapa au, neme hataholi mangalauk-ka, koasan-na mai, ma manea au, neme hataholi fo, ana sanga ka'da nale'a-napilk, fo ana tutu'u soaneu tao natu'da au.

⁶ Hataholi manakoao-ndaeaok-kala, no denge-dengek, ala lona hihi'ik, soaneu au, ma ala pilu dala, fo ala ho'u-la au. Ala lona hihi'ik su'di enok-ka nanalun-na, fo lakahihi'ik au.

⁷ Ou Manetualain, au afa'da ae, Au Manetualaing-nga nde O, de taoafik neu au dokodoeng-nga leona.

⁸ Amak, fo au Manetualaing-nga, nde bee-na au manasoi-manatefang fo, mabe'i-balakaik, O masulu-mahapa au, nai natee-natatik dale so.

⁹ Ou Manetualain, boso sipok hataholi managalauk-ka huhule-haladoin, boso sipok sila tutu'u tipu-dain-nala.

¹⁰ Boso po'ilotak au musung-nga sengi; nemen-na fo, ala kokolak dede'a-kokola mangalauk-kala, sa'e-na sila fo, manakokolak langgenggeo au na'deng-nga.

¹¹ Nemen-na fo, ha'ikaak manapila lo'a-lo'ak-ka, la'es nakandondoo henin, ma nanatapa henik, leo bolo mamates dale leu, nalosa ala ta bisa kalua leo deak mai so'on.

¹² Nemen-na fo, susa-soe tuni-na hataholi fo ana hii ka'da nale'a-napilik-ka, boso po'ilotak hataholi manakokolak nanggenggeo hataholi na'den-na, ana leo daebafak ia.

¹³ Au bubuluk, O fe ndoos ma matetuk-ka neu hataholi nanatuni-ndenik-ka, ma O masala'e hataholi nuu ta-hata tak-ka dede'an-na.

¹⁴ Hataholi manatao tunga ndoon-na, neukose ana koa-kio O; ma neukose ala leo sama-sama lo O.