MAZMUR 125 - Susula Malalaok Hehelu Palak Ma Hehelu Beuk

Nee-nee lino-linok nai Manetualain nasulu-nahapan-na dalek

¹ Nakamee dodonge-dadamak. Hataholi fo, namahele neu Manetualain nde bee-na, sama leo Pupuku Sion fo, matea-mahelek de ta nanggengo fa, ma nakatatakak losa dodoon-na.

² Sama leo letek-kala lasulu-lahapa Yerusalem, leondiak, Manetualain nasulu-nahapa anan-nala neme besak ia, losa dodoon-na.

³ Neukose hataholi mangalauk-ka, ana ta koasa nakandoo nai hataholi manatao tunga ndoon-na, dae pusakan-na fa, fo ela hataholi malole-a, ta tunga tao tatao-nono'i mangalauk fa.

⁴ Ou Manetualain, tao malole neu hataholi malole, ma neu hataholi fo, dalen-na ndoos.

⁵ Tehu hataholi manake'di-ndiuk-ka, ela leo bee-na, Manetualain hukun, sama-sama no hataholi mangalauk-ka. Ela leo bee-na, O anam-mala so'da-molek!